Sunday, September 11, 2011

Thantlang Khua Ah Kawlbiaknak Thlacam Ni Sianginn Khar In Zarhte Ni Fatin Sianginn An Kaiter Hna


THANTLANG: Thangtlang khua ah sianginn a kaimi siangngakchia hna cu Kawl an thlacam ni ah sianginn khar a si pinah sianginn an kharmi ni can ah Zarhte ni fatin sianginn an kaiter ṭhan hna, tiah thawng theih a si.

Inn 1600 renglo a simi Thantlang khua ah Laimi chungin Kawl biaknak a biami an um lo nain nihin ni tiang Kawl biaknak he ai pehtlaimi cu ulh dih a si rih. Kawlbiaknak thlacam ni (U-poh-neh) cu July thla canceo in October thla (thlapa lai) tiang a si i Thantlang ah a ummi cozah zung dang hna cu khar a um lo nain Thantlang ah a ummi a cozah sianginn paoh cu zarhkhat nikhat khar a si, an kharmi ni airawlh ah Zarhte ni paoh ah nidang bantukin sianginn cu kai tho tho a si, tiah Thantlang High School siangcachim pakhat sin in theih a si.

" Hi bantukin (u-poh-neh) kan kharmi hi a ṭha ko. A ruang cu kannih Lai saya/ma te cu Phungki sianginn ah kan kal lem lo i a ṭha ko. Zarhte ni zong kan kai hi a ṭha ah ka ruah ko. Kan kai lo ahcun phungki sianginn ah laoh-aa peek ṭhiamṭhiam ding kan si. Ka rem lomi belte cu kannih Khrihfa lei in biaknak dang nih laoh-aa peek a um ṭung lo i anmah phungki sianginn theng ah laoh-aa an kan peek termi cu a ka neng tuk. Kawlram ah duh nalo in laoh-aa peek a um ti lo an ti ko nain a tubantuk in loh-aa an kanpek termi hi kan celh lo," tiah High School siangcachim sayama pakhat nih Seihnam sin ah a chim.

Thangtlang khua ah siangcachim Saya pakhat zong nih," Thantlang High School ahhin sainguk (Sayakyi) telh in Kawl saya/ma te hi 15 tluk lawng an um. Cucaah hi bantuk Kawl biaknak ni paoh cu sianginn khar peng a si rih ko. Kanmah Laimi chungin sianguk an ṭuanlio ah cun ulh a si bal lo. A luancia kumthum lio in Kawl sianguk lawngte nih an ṭuan caah Kawl biaknak ni (u-poh-neh) cu ulhpi peng kan si. Niruk ni sianginn kan kai tik ahhin a thaizing Zarhpi ni a si tikah keimah pumpak cun kai ziak lo ngai. Zarhpi ni caah timhtuahnak ka ngeih manh lo caah a har ngai in ka hmuh. Cun hi ti hin (u-poh-neh) hi a um lo ahcun Zarhte ni paoh ah Phungki Sianginn ah laoh-aa peekter a si ṭhiamṭhaim," tiah a chim.

Chin ramkulh chungah Laimi nih cozah rianṭuan duh loin ramlengah kan chuah dih ngawt caah Lairam sianginn kip ah Kawl miphun siangcachim hi an um dih cang, tiah theih a si.

0 Careltu Hmurka:

Post a Comment

Twitter Delicious Facebook Digg Stumbleupon Favorites More

 
get car insurance