Sunday, October 16, 2011

Editor Hmurka ( Seihnam: Avoi 500nk)

US cozah nih kan hnu 2010, September thla lioah 2011 chung caah vawleicung ramzakip in ralzaam lak dingmi cazin ah 80000 a rak ti i, hi chungah East Asia in 19,000 lak ding ti a rak si. 2011 September 30 ah in 2011 chung lak dingmi cazin cu a hung dih ve i, kum 2012 ralzaam lak dingmi cazin zong US cozah nih thanhnak a hun tuah cang. Aralaimi 2012 kum chungah vawleicung ramzakip in ralzaam 76000 lak ding in US ramhun nih minsenthutnak cu a ngeih cang.

Hi zawn ah, 2011 nak in a ralaimi 2012 kum hi ralzaam a lak dingmi milu 4000 a hung zor. Cupin ah East. Asia in thongkhat tluk a hung zor. East Asia chungah Thailand UNHCR, India UNHCR, le Malaysia UNHCR chung in lak dingmi hi i ṭhen phawt rih ding a hung si. Kum dang nak in tlawmdeuh an kan lak lai ti cu a fiang ngaingai. Hlan lioah Laimi (Chin) miphun cu miphun dang nak in hmaipek(U-sa-pe) kan rak si nain tukum thok cun Malaysia asi-ah Thailand, India asi-ah hmaipek dawh kan si ti lo.

US kum rel ning in 2011 caah ralzaam lak dingmi cazin a dih cang bantukin October thla thokin 2012 kum caah ralzaam milu an khiah ning in lak hram cu an thok cang lai.

Chim Ko Ning Ka Lungbia

Chin Pipi

Lai rawn kan khua te le hawi ka kom le kha, zei pei an ṭuan lio tiah lungthli ka nawl tawn.

A langhnak in ka cuan tawn kan khua umnak, mual liing leeng tlang nih kan phen kaw lang lo-in

Lunglen hlei ah a ceu thlapa a vang ṭhan aw.. zaan dang bang .. tiin zaanṭim khua mawt ah lungleng in khua za za ruah lio ah khin...

Van khua ri le ṭek thlak thawng khi bang...

Thih ka ṭih lo rak chuak uh tiah arpi daapmap sahngar tei lai khi bang, an au an khuang Imbi zalam phei rawn ah...

Maw ka thin aw Lai pasal rual hna ti i ka hram lio ah khin, Miphun dang val pum rua ṭha hung lang ai hna an rei kiang pawng ah.

Apa Apa an vun ti.. dai dep hna maw val ṭha rual, ti khing thehreng dih that bang
An ṭhutter hna an rual in, an chuih , an lamh an bengh hna, Lainu fa dawt ve lo bang, ka hei zoh ngam hin lo ee

Cung khuazing nu kan bawm law, Laimi kan vun nau fak ai, hnawt cawk hlah in kan mitthli, nilin thlansat ka tuar hlei, ka thinlung nih ing chap hoi. Maw fapa dawt hrin hniang rual cu ngai ka celh hin lo cu

Pawcawmnak ah rianhrang ṭuan a har nan ti nan mawh lo. Hmanhsehlaw ee nan baat hnu, zaang hlei cawi in Kawl dawr ah man zureu cu nan din hoi , RM.0 fangkhat taang lo-in.

Mahnak cha cun ka dawt le, taksa, thinlung, thlarau ca, damnak, ṭhawnnak, fimthiamnak, Bawipa pekmi ti le rawl, dung uh, ei uh, nan ṭuan man, ei le din cu thazaang ca, thih ka tha le nawl ka hram, pupa rosung phungthlukbia.

Kaar sawm riat le kaar nga sang, remh hlei ruun inn donh thum cung ṭhu, ṭum kai kho lo na pi hi, hung ka hruai law ka baan in CCCM biakinn ah, Vanbawi fa par kan tlan lai…

Misual kut in Chin ralzaam pakhat a nunnak a liam


Chin ralzaam Simon Lian UK cu aho theih lomi nih October 13, Cacawn ni li ni zan ah PUDU Plaza in innlei a ṭin pah ah misual nam in an sawh i a nunnak a liam, tiah thawng theih a si.

Falam khuami Simon Lian Uk , 21, cu namhma a put le cangka in innlei ah a zaam pah lampi ah a nunnak a liam hi a si, tiah mithmu pakhat nih a chim.

"Zeitin dah hi thil a canning a si ti hi fiang in kan thei cio lo. Thil a can hnuah Laipa pakhat nih zungah thawng a thanh i cu hnu lawngah Palik cu an ra i a ruak cu an hlawm, chikhat te ah a ruak cu an kalpi colh lo, zeitin dah thil a canning a si timi pawl palik nih chekhlatnak an ngeih hnuah a ruak cu an lak, tiah a ruak palik nih an lak lio ah a um vemi Laipa pakhat nih a chim.

Simon Lian Uk hi an sawhnak hmun ah chikhat te ah thi colh loin tlawmpal cu zaam ta dawh a si tiah Palik nih a thihning kong he pehtlai in an langhter.

Simon Lian Uk, cu Malaysia ah 2010 April thla ah a rak phanmi a si i UNHCR sinak card zong ai tlaih cangmi a si.

Palik nih a ruak cu Chowkit Sizungpi ah an kalpi i chekhlatnak an tuah lio a si, tiah theih a si. Zeitik ni ah a ruak lak khawh a si lai timi fiang in theih a si rih lo.

Tubantuk in a luancia thla hnih lioah Laimi tamngai umnak Puchong zongah aho nih a thah ti theih thai loin Hrangkhan khuami pakhat zong a nunnak a rak liam.

Malaysia cozah nih phungning lo (illegal) thianhnak a tuah lai

Malaysian cozah nih Malaysiaram chungah phungning loin a ummi (illegal) pawl thianhnak cu tukum kum dih lei in a thok cang lai tiah theih a si. Hi phungning lo thianhnak (oparasi) ah sing 4 renglo palik le Rela i bawmh in thianhnak cu an tuah te lai tiah Malaysia cozah nih timhtuahnak an ngei.

Tubantuk phungning lo (illegal) thianhnak dingah immigration nih an hruai hna lai i pumpek in mi tlaitu sing 4 renglo an si te lai. 125,000 palik le 110,000 ralkap zong mah phungning lo thianhnak (oparasi) ah cun an i tel lai, tiah theih a si.

October 14, Cacawnni nga ni zanlei sang ah humhimnak lei vuanci zung chungṭuan, Tan Sri Mahmood Adam nih, “Hi phungning lo in a ummi ramdangmi thiannak ding kong le zeitin rian tlaih an si lai timi cu ceih dih a si cang,” tiah a chim. "An tlaih tik hna ah mitlaitu nih mah duh in tlaih an si lai lo Immigration nih a chim ning bantuk in mitlaihnak (oparasi) cu luh a si lai, tiah a chim chap.

Vuanci zung i meṭing lioah Mahmood nih a chim ṭhanmi cu, passport a ngei lomi ramdangmi rianṭuantu pawl, 6P tangah a kut a nam lomi cu tubantuk thianhnak (oparasi) kan luh hlah ah anmah tein, rak i ap zong ah a ṭha deuh lai, tiah a chim. "Anmah tein an i ap ahcun Malaysia Law ning in dandatnak pek an si lai lo, an ratnak ram tu ah a si khawh chung in kuat khawh kan zuam hna lai, tiah a chim."

"Ramdangmi phungning loin a ummi thianhhlimnak (Oparasi) cu a rauh hlan ah thok a si lai," tiah a chim.

Hi kong he pehtlaiin CRC Coordinator nih, “ tubantukin Malaysia cozah nih thawngpang a thanh cu a poi ko, UNHCR card ai tlaih lomi tampi cu tlaihkhih tam ngai an tong te ko lai,” tiah a chim. Zeitik ni theng ah phungning lo ramdangmi thianhnak hi an tuah lai timi cu, theih khawh a si rih lo nain tukum chungah cun an tuah ko lai, tiah a chim chap. —Chinland Guardian.

Tlangcungmi ralzaam hna nih Kawlcozah cungah an duhlonak an langhter


Malaysia tlangcungmi ralzaam 400 renglo nih Kuala Lumpur, Kawlram palai (Embassy) zung pawngah Kachin ram i Kawlralkap nih Kachin mipi cung i an tuahmi namnehnak le an thahmi hna kongah, an duh lonak cu October 11 ni ah an langhter.

Kachin miphun hruaitu pakhat chimnak ah cun, cozah he kahdaihnak tuah hnu 1994 kum in ramkulh chungah hriamnam in kahnak le tlaihhremnak a phunphun le namnehnak cu kan tong peng rih ko, tiah a chim. “Kan hnu June thla tiangah Kachin mipi 40,000 cu an umnak khua, inn le lo chuah takin luatnak hmuhnak dingah an umnak khua an zaam tak,” tiah a chim.

Thein Sein cozah nih catlap cung le an bia in an chimnak ah, ‘Kawlram chungah zalonnak a um cang, ramkulh kip cungah ralkap nih namnehnak a um ti lo tiah an aupi len nain catlap cung lawngah le ṭialmi catlap cung bia lawng a si, tiah Kachin hruaitu pakhat nih Malaysia tlangcungmi nih Kawlram palai zung pawng i au-nak an tuah lio ah a chim. Kawlram cozah thar zong hi an chimning bantukin zeihmanh an tuah an ṭuanmi a um lo. Nihin ni tiangah Kachin ramchungah hriamnam in an kah rih hna, an tlaihhrem hna, hi hi a daimi ram kan ti khawh lai maw tiah a chim chap.

Kachin hruaitu pakhat nih sandah piahnak hmun ah cun , zauk phung ningin a kalpi mi cozah hi kan ram hi a herh tuk hringhran. Catlap cung lawngah zalongmi si loin atak a simi zalonnak a hmumi kan si ding hi mipi nih kan herhmi a si. Kawlram chung ramkulh kip ah fimthiamnak , biaknak, chawkhelnak lei ṭhanchonak le zalonnak hi an kan pek awk a si, tiah Kachin hruaitu nih mah au-nak ni ah Malaysia thawngla pawl sinah a chim.

Hi sandah piahnak hmun ah Laimi 80 hrawng kan i tel kho ve i CSO siangngakchia zong tamngai an i tel.

Malaysiaram ah Kahcin ralzaam hi 6,000 renglo an um i a tam deuh hi Tuluk le Kawlram ramri ah ralzaam dirhmun in camp ah an um hna tiah theih a si.

Lai ralzaam pakhat nih palikpa phaisa a hal ruangah ningzah ai huah

Lai ralzaam pakhat nih ai chawk liomi mikip sinah phaisa a hal hna ruangah dawr chung um palikpa nih tlaih a timh lio ah an nawlpiak i a luat ṭhan tiah thawng theih a si.

October 11 Cacawn nihnih ni chunlai cingpi ah Jalan Alor GEREJA Baptist biakinn hmai ah Letpanchawng khuami, Tahan um Pa Ma Sang nih lampi i a hmuhmi hna paoh phaisa ahal hna i, ahohmanh nih an pe duh lo i adonghnak ah palik uniform ai hrut lomi palikpa dawr chungah A-ee a din lioah rumro loin phaisa a va hal i palikpa nih, ‘nangmah passport hmanh ngei lomi, permit zong a ngei lomi mihrut saram bantuk tiin a hrolen kha Lai upa pakhat nih a va hmuh hna i, a va nawl piak hnuah an kalter ṭhan.

Jalan Alor ummi Zuala nih, “ Ziah! Mi ramdang mi cu phaisa na hal hna tiah kan hal tikah ‘lawinak ka ngei lo, tiah Falamholh in a ka leh. Palik pa cu a tho i a kal pah in a zai len, atai ah pistol ai thlaihmi kan hmuh hnu lawngah palik a si kha kan theih i ningzak ngai in keimah nih ka ṭhawl,” tiah a chim.

Jalan Alor i biakinn hmai hrawng hi Lai ralzaam tampi cu kutdok in phaisa hal a hmangmi an tam ngainak hmun pakhat a si. Cupin ah rit-haisii a zumi le a hmangmi an tamnak hmun le lam lai ah ih a hmangmi Lai ralzaam zong an um pah lengmang fawn, tiah theih a si.

Ralkap nih thing-ram man tiin bing cin-man an kholh

Chin ramkulh Cikha khua hrambunh (2740 in Bo-ci Aung Tin Moe nih khuachungah khuakhat hnu khua khat in thing-ram (A-khuun) tiin a ti i bing an cinnak (a-khuun) an kholh hna tiah thawng theih a si.

Tuthla chungah Bo-ci Aung Tin Moe le a hnuzul pawl cu khuate lei ah an i chawk i Thing-ram man an kholh, khua khat ah Rubee 15000 cio in an kholh hna hi a si.

Ralkap nih tubantuk in thingram (a-khuun) an kholhmi cu bing cinnak ah an hmanmi thingram man, mipi sinah an kholhmi a si ko, tiah Cikha khuami pakhat nih a chim. "Hlan ahkhan cun bing cinnak ding hmun hi ralkap sinah nawl hal ta a si. Tu ah cun khuami cheukhat bing an cing ti lo," tiah a chim chap.

Khuachung biaknak lei le buu dangdang pawl nih bing an cinmi kongah bing cin a ṭhatlonak chimh cawnpiaknak cu biatak in an tuah i, mipi nih bing cinning hi kum dang nakin a zor deuh ngai cang tiah theih a si.

"Bing he pehtlai in fimchimhnak an tuahmi cu an hlawh a tling ngai tiah chim khawh a si. Bing cin cu biaknak lei he ai ralkah ngaimi a si, cupin ah mino tampi nih bing cu an teh tawn ruangah ṭhatlonak tamtuk a chuahpi," tiah Cikha khua mino hruaitu pakhat nih a chim.

Aluanciami September zarhkhat nak ahkhan No. 2 India-Kawlram pehtlaihnak lam cung ramri tiva ah, Chin ramkulh Rihkhuadar khuathar hrambunh (No. 274) ralkap in Bo-hmu Aung Aung nih Indian miphun bing in chaw a letmi pakhat he tonbiaruahnak zong an ngei, tiah theih a si. —Khonumthung News.

Chin ramkulh chung khuate 30 renglo ei-din an har

Tukum November thla chungah Chin ramkulh Matupipeng, Paletwa chung Mara chung khuate khua 30 renglo ei-din an har rih ko, tiah Matupipeng khuate mi pakhat sin in theih a si.

November thla ah facang ṭuan ding ni le caan a hung naih cang, nain khuami tampi thinphang in an um. Marapeng chung i tlanglo ( caang hmun) an tuahmi hna hi an ṭha lo," tiah Lailenpi khuami pakhat nih a chim.

Inn 200 renglo a simi Lailenpi khua chungah inn 2 lawng nih tlanglo facang an zunmi in kum an chuak kho tiah thawng theih a si.

Tubantukin Laimaan khuami pakhat nih," kanmah kan khua ningin tlanglo kan tuahmi a ṭha lo. Facang hi anmah thih in an thi," tiah a chim.

Chin ramkulh chung mau a par ruangah harnak a tlungmi cu 2006 kum in 2010 tiang a can ruangah eidin harnak cu fak ngai in rak ton a si. Dawtnak le zawnruahnak a ngeimi mibawmtu pawl nih an si khawh chungin an i zuam i an bawmh hna, tiah bawmh a tongmi khuami pakhat nih a chim.

"Tutan ei-din harnak kong hi mau par ruang theng ah si loin, Mara peng ning ngawt in an lo tuahmi a ṭhat lo caah zei thengah a ṭhat hna lo ti hi a ruah awk theih a si lo," tiah Tisih khuami pakhat nih a chim.—Khonumthung News.

Chin miphun thing-atmi 3 thihnak ruangah lunghrinhmi 4 tlaih an tong

Kan hnu thla September 13-14 chungah Chin miphun 3 a thimi kong he pehtlai in lunghrinhmi 4 cu Mizoram nawlngeitu palik nih an tlaih hna tiah thawng theih a si.

Mizoram ramkulh Lunglei ramṭhen Mante khua pawng tiva kam ah thing a atmi Chin miphun 3 cu an ruak in September 21 ah an hmuh hna i ti chungah an ruak cu char an si tiah thawng theih a si.

Matupipeng Atka khua Aung Nain Oo le Ruazua khuami pahnih ruak cu September 21 ni ah an char hna hi a si.

"Palik nih lunghrinhmi 4 cu an tlaih cang hna. Palik nih an ruak cu chekhlatnak an tuahmi chungah an pum chungah hma an pu pah i, pakhat cu a lu ah hma a um," tiah a thimi chungkhar pakhat nih a chim. Tlaih a tongmi pakhat cu Kawlram ralkap in a rak zaammi a si i, lai a nawng bal cangmi a si kong zong theih a si. A dang pakhat zong hi sualnak lei ah amin a lang ngaimi a si ve i, mithi pathum hna he an rianṭuannak hmun ai naih ngai hna tiah a chim chap.

Palik nih an chim ningah cun tubantukin mithi kongah mi nih an thahmi hna an si le si lo hi theih a har ngai cang, an ruak zong a rawk pah cang i a har ngai, tiah an chim kong zong theih a si. Hi thil a rak can lio hrawng hi ruah ngol loin a sur lio caan a rak si. Ti zong a rak lian ngaingai i ti hna nih a fenhmi hna an si hnga maw ti zong, mi cheukhat nih an zumh kong, an langhter ve.—Khonumthung News.

Kawlrammi asylum dornak a sokmi min cazin ah an tambik

Malaysia ramchungah ramleng in humhimnak dingah (asylum) ai dormi lakah Kawlrammi hi an tam bik an si, tiah Dewan Rakyat nih October 11, Cacawn nikhat ni ahkhan a chim.

Prime Minister Zung in chimnawlngei Datuk Seri Mohamed Nazri Aziz nih, August thla tiang i asylum in a ummi 10,850 chungah 7,582 hi Kawlrammi an si, tiah a langhter.

UNHCR nih a langhter ning ahcun milu 94,843 chungah 83,993 hi ralzaam an si i a dang a tangmi minung 10,850 hi asylum in ai dormi an si, tiah The Star thanhca nih a ṭial.

“Ralzaam milu 67,145 hi pa an si i 27,698 hi nu an si, Kawlrammi 7,582 hi himnak dingah Malaysia ah ai dormi an si, tiah Lim Lip Eng (DAP) nih a chim.

Nazri nih, Malaysia cozah nih ralzaam timi cu phungning loin a ummi ah an ruah hna. UNHCR card ai tlaihmi zong a luancia caan ah cun tlaih peng an rak si i, phungning loin a ummi bantukin ruah peng an si, tiah a chim. Malaysiaram cu 1951 le kum 1967 lio ah ralzaam cohlannak kongah minsen a rak thu duh lomi an si, tiah hmuh khawh a si. "Malaysia cozah nih ralzaam pawl cu caantawi umnak nawl lawng pek an si i, ramthumnak an kal tiang hi cu theihthiam piak an si ko, tiah a chim.

Malaysia cozah nih ralzaam cohlannak kongah minsen a rak thut lo ruangah ralzaam kip humhimnak le ṭhutdirnak kongah biatak in rian a ṭuan lonak hi a si. — Bernama

Chin Biaknak lei hruaitu nih zaangfahnak he Kachin ramkulh ah an tlawng hna

Chin khrihfabuu hruaitu pawl cu Kachin ramkulh khualipi Myitkyina khua i Kachin Baptist Convention ah va tlawnnak ngei dingin timhtuahnak an ngei, tiah thawng theih a si.

Kawlralkap le Kachin hriamtlaibu i kahnak ruangah harnak a tongmi zawnruahnak in Zomi Baptist Convention Chin pastor te nih raltuknak in harnak a tongmi le ralzaam pawl bawmhnak caah tiin atu bantukin an tlawnnak hna hi a si.

ZBC President Rev. M. Thawng Kam nih, " Myitkyina khua ah tlawnnak hna hi kan unau taktak a simi Kachin pawl cu harnak an ton lio caan a si caah a si. Hi kan va tlawnnak ah bawmhnak pe kho dingin ZBC, CACC le Thangtlang Baptist Church nih KBC hruaitu sinah bawmhnak cu pek dingin timhtuahnak ngeih a si,” tiah a chim. "Kanmah zong nih biatak in thawngpang kan theihmi cungah kan i zuam i, phaisa zongin biatak in bawmhnak phaisa kawl kan i zuam. Cupin ah Kachin mipi hmunkip ah (duhlonak langhternak) au-nak an tuahmi cungah kan dirpi hna. Kan thlazacamnak zongin biatak in kan bawmh hna," tiah a chim chap.

Kachin Women's Association of Thailand (KWAT ) nih repawt an tuah ningah cun, Kachin mipi 25,000 renglo hi Tuluk le Kawlram ramri i ralzaam camp ah ei-din, ti-rawl le sii-ai lei le a dangdang kongah har ngai in an um kong zong an chim i, bawmh an herh ning kong zong, an langhter chih. Mizoram khualipi Aizawl khua a ummi Chin mipi buu Chin Humannitarian Group nih Kachin ralzaam bawmhnak dingah mah le pengtlang kip cio ah le biakinn kip ah forhfialnak zong an ngei tiah theih a si. Kachin ramkulh ah a cangmi i raltuknak ruangah ralzaam an karh i vawleicung pi in Kawlcozah cung i an lungtlinlonak cu Tuluk le Kawlram palai zungah an langhter. ‘Thein Sein cozah nih ralkap a chiahmi hna kirter hna seh. Cun, Tuluk cozah nih Kachin ralzaam a simi paoh Tuluk ramri ah dornak pe hna seh, Tuluk cozah nih Kawlcozah a bawmhmi zong hi ngol cang seh, tiah an aupimi cu a si. —Chinland Guardian.

Thongtla chuahmi chungah CNA ralkap hlun ai tel

Chin ramkulh Mindat khuami Aung Aung@Bawi Thang cu Thein Sein cozah nih October 12 i Kawlram ramchung thongtla 6,359 an chuahmi hna chungah ai tel ve, tiah thawng theih a si.

Bawi Thang cu Chin Miphun Ralkap (CNA) ralkap ah 2000 kum in a rak lutmi a si i, Hakha in Rangoon lei khualtlawng dingin ai thawh ah Hakha khua bus station ah an rak tlaih hi a si, tiah amah he ai naihniammi chungkhar pakhat nih an chim. Amah cu kum 10 thongtla dingin dantat an rak pekmi a si i, kum 3 hi cozah a dohtu buu bawmtu a si timi dantatnak le adang kum 7 hi khualtlawnnak a hmaan lomi lih in siammi ai ken ti ruangah a zate kum 10 thong-daan an rak peknak hi a si.

" Hakha ah ralkap ngiathlaitu nih an rak tlaih hi a si i, hi an tlaihmi zong hi midang Cengtum khua pawng a ummi CNA ralkap hlun nih thawng a thanh ruangah tubantukin an rak tlaihnak hi a si, tiah Bawi Thang chungkhat pakhat nih a chim. Cengtum khuami pakhat nih, Aung Aung timi pa hi Chin ralkap a bawmtu hna a si, a thli thup in Kawlralkap a ngiathlaimi a ti kong zong, a chim chap.

Kalay thonginn pi ah kum caan saupi thongtla ding a simi ruahlo piin luatnak a vun hmuh ni ah a chungkhar le a miphun hawi nih lunglawm tein an don.

Aung Aung a cawmkengtu apa le adang an chungkhat minung pahnih cozah rianṭuanmi hna zong Aung Aung kong he pehtlai in le an rian caan hman tein an ṭuan lo ti ruangah an tlaih ve hna i thla 6 thong an pek hna ve hna tiah an chim. Bawi Thang, kum 30, hi Chim ramkulh Thantlanng peng Sentung khua in a cawmkengtu apa zohkhennak in a ṭhangmi a si. —Chinland Guardian.

US nih a ralaimi 2012 kum caah ralzaam laak ding milu cazin a chuah


US cozah nih a ralaimi 2012 kum caah hmanding a timhtuahmi tangka (budget) suainak thar a ngeih lawng siloin vawlei cung, ramkip ralzaam hna cohlan le laaknak ding a timhlamhmi milu zat zong thawngthanhnak a tuahchap. September thla dih le October thla thok karlak hi US nih kumkhat chung hmanding tangka a ngeihmi (fiscal year (FY)) ni-caan a dihnak a si. Kan hnu September 30 ni ah US ramhun, Barack Obama le Congress nawlngeitu upa hna nih “section 207 of the Immigration and Nationality Act (the “Act”) (8 U.S.C. 1157)” phunglam he aa tlaak ningin vawlei cung, ramkip ralzaam hna laaknak ding konglam he pehtlaiin thawngthanhnak an tuah. Hmaikum 2012, kum hramthok in kumthluan a dongh tiang US ram nih vawlei cung, ramkip ralzaam milu 76, 000 tiang kan laak lai tiah US Inn Rang lei ṭuanvo ngeitu hna nih fehternakhe covo khiahnak thawng an zamh. US nih a ralaimi 2012 kum caah ralzaam laakding bia a khiahmi, milu zat cu a tanglei bantukin a si.

Afrika-----------------------------------------------------12,000
Asia, nichuahlei ram --------------------------------------18,000
Zurup le Asia laicer ram -----------------------------------2,000
Latin America / Caribbean rili pawngkam ram-----------------5,500
Asia nichuahlei / thlanglei pawngkam ram-------------------35,500
Unallocated Reserve ----------------------------------------3,000

(Unallocated Reserve tiah an tihnawhchanmi cu vawlei cung, khuazei rammi an si tiah fiangfai in bia an chahkhawh rihlomi hna caah covo an khiahpiakmi a si.)

US ramhun, Barack Obama le Congress nawlngeitu upa hna nih “section 101 (a) 42 of the Act (8 U.S.C 1101 (a) (42))” phunglam an ngeihmi he aa rup ningin a tanglei ram ah aa dormi minung hna zong US ram nih laak dingin biachahnak a tuahnolh.

a. Cuba ram ah a ummi
b. Zurup, Asia lei in le Baltic rili pawngkam ram ah a ummi
c. Iraq ram ah a ummi
d. Vawlei cung, US palai zung umnak ram asiloah khua ah a ummi

Ṭumchuk lei a panh

A ralaimi 2012 kum caah US cozah nih vawlei cung ramkip, ralzaam milu 76,000 laak dingin biachanhnak a tuah. A luancia 2009, 2010 le 2011 (tukum) caah US cozah nih vawlei cung ramkip, ralzaam milu 80,000 laak ding pehzulh in biakhiahnak a rak tuah. Cu caah a ralaimi, 2012 kum caah milu a khiahmi cu kum dangnak in 4000 buaktlak in a tlawmdeuh.

Asia, nichuahlei ram (East Asia) timi covo zawn ah Kawlrammi (Burma) ralzaam pawl kan i tel. Hmaikum, 2012 caah Eash Asia nih covo a hmuhmi cu 18,000 a si. Tukum 2011 caah US cozah nih Asia, nichuahlei ram ah ralzaam milu 19,000 laak dingin covo a rak pek. Cu caah hmaikum leicu milu 1,000 tlawmdeuh laak a timh caah ṭumchuk lei a panh tihi fiangtein hmuhcuanh khawh a si. Hi chungah tambik a laak tawnmi cu Thai-Burma ramri le Malaysia i a ummi, tlangcungmi Karen le Chin ralzaam pawl hi kan si. Hika covo chungah Vietnamese, North Korean, Bhutanese, Nepal, Sri Lankans, Chinese miphun le a dang Asia nichuahlei ram in minung zeimawzat zong an i tel ve.

Hmaikum 2012 caah Afrika leiṭhen nih covo 12,000 lawng an hmuh ve caah tukum (2011) nak in 3,000 tlawmdeuh an hmuh. Zurup le Asia ram laicer, Latin America / Caribbean rili pawngkam um ram, Asia nichuahlei / thlanglei pawngkam ram le khuazei rammi an si tiah fiangfai in chim khawh rihlomi hna i an covo cu 2011 kum covo ningkhel in a si. — WhiteHouse.Gov, USA.Gov, USCIS.Gov

Iran Fidinu, a voi 90 tuk dingin dan an tat


Iranian fidinu pakhat cu ‘My Tehran for Sale’ timi baisakup dal chungah Islamic biaknak nih fidi cawlcanghnak he pehtlai in ri a khiahmi le phunglam sermi a buar timi sualpuh ruangah kumkhat thongthlak le voi 90 tuk timi dantatnak an pek. Fidinu, Marzieh Vafamehr dan an tatnak thawngpang cu Iran cozah a dohtubu nih an maivan website chungah thawngthanhnak an tuah. “Biaceih zung nih a sual tiah bia an chahpiakmi cu Marzeih Vafamehr a si, kumkhat chung thongthlak ding le voi 90 tuk dingin dantatnak an pek” tiah Kalamaeh.com chungah thawng an zamh. Marzieh Vafamehr ai-awh biachim piaktu nih zaangfah zawnruahnak he nawlnak a tuahmi cu biaceih zung nih an cohlanpiak lo tiah thawng an zamh nolh. Marzieh Vafamehr cu ‘My Tehran for Sale’ baisakup chung ah hlanlio thilkal ning a tlaihchan ngaimi, lungput aa khat ngaimi le a puar ngaimi biaceih bawi tibantuk a phunphun in soiselnak a langhter caah July thla ah an rak tlaih. Baisakup chungah Iran khualipi, Tehran ah puai tuahnak le laam piahnak in pawcawmnak ca a ṭuanhawlmi nute cu nawlngeitu hna nih ngol dingin rumro in an kham. Minu nih nawlngeitu hna cungah a lungfahnak cu thlithup soisel nak le zalon kawlnak he hi baisakup chungah a langhter. Hi baisakup cu Australia zukthlak thiamsang hna he i funtomnak he Marzieh Vafamehr vapa, Nasser Taghvai nih a thlakmi a si. ___The Telegraph

NTC: Mutassim Gaddafi kan tlaih cang


Libya ramhun hlun Muammar Gaddafi fapa 5nk, Mutassim Gaddafi cu Sirte khua ah kan tlaih cang tiah caan karlak cozah National Transitional Council (NTC) bu nih thawng an thanh. Mutassim Gaddaffi (kum 33) cu mawṭaw chungah a innchungkhar he zaam an i timhlamh lio ah kan tlaih hna i biahalnak tuah dingin Benghazi khua ah kan kalpi hna tiah NTC bu lei chimnak nawlngeitu Colonel Abdullah Naker nih thawng a thanh. Muammar Gaddafi (kum 69) chuahkehnak Sirte khua i 80% cu kan laak khawh cang tiah a dohtu hriamtlai bu pawl nih thawng an zamhnolh. Asinain, amah Muammar Gaddafi cu nihinni tiang khuazei a umti fiangfai tein an hngal kho rih lo. Culawng siloin, Sirte khuachung ah Muammar Gaddafi ṭanhtu ralkap pawl le a dohtu hriamtlai bu pawl cu fakngaiin an i kap cuahmah. ___Reuters

Mawṭaw man peknak ding caah kumtlinglo nu, hlawhhlang rian a ṭuanter

Mexico ram ah mipa pakhat nih kumtlinglo mino nu pakhat cu ṭhihphaih le rumro in hlawhhlangnu a ṭuanter timi sualphawt ruangah nawlngeitu hna nih taza an cuai. Mipa nih kum 17 lawng a si rihmi, mino nute cu hlenthainak le hrocernak he a mawṭaw (car) man pekkhawhnak ding caah tubantukin hlawhhlangnu a ṭuanternak cu a si. Mexico City tazacuainak lei nawlngeitu hna nih “harsatnak a intuarmi nute cu hlawhhlangnu a ṭuanhlan, tuanhmasa September thla thok ah mipa he an umṭi, mipa cu sualphawt ningkhel bantukin a mawṭaw leiba chamrulh khawhnak caah minu cu a hlangtupa a va kawlpiak i cuticun a zuar” tiah an chim. Mino nute nucan ziaza a hrawh ruangah tubantuk in mipa cu taza an cuainak a si. Tuzacuaitu lei nih an chimnak ah harsatnak a intuarmi nute cu Mexico City khualipi laifang i a ummi Hotel pakhat chung ah an hmuh. “Mexico City ah pawcawmnak caah mi sinum rian ṭuan dingin, a luancia kumruk lio in ka rak i ṭhial” tiah ngeihchia lungkuai ngai in nute nih a chim. ___AP

UNICEF:Africa ram ah ngaleu zawtnak in a thimi an tam


A chuak tharmi, ngaleu zawtnak (cholera) ruangah nitlaklei Afrika ah minung 2,500 dengmang an thi cang tiah U.N ngakchia zohkhenhnak lei bu nih thawng an thanh. Ngaleu zawtnak in hizat milu a thih hi nitlalkei Afrika ram nih a tonbalmi lakah a tambik zong a si. The United Nations Children's Fund (UNICEF) nih “nitlaklei Afrika ram ah ngaleu zawtnak a intuar ruangah aa thlopbul liomi minung 85,000 tluk an um” tiah thawng an thanh. Nitlaklei Afrika ram nih khulrang tein chawnh khawh a simi ngaleu zawtnak cu fakngaiin an intuar i nikhat hnu nikhat, 4.7% tluk a thimi milu an karh. UNICEF lei chimnak nawlngeitu Marixie Mercado nih “a ralaimi zarh chung zongah khulrang tein chawnh khawh a simi, ngaleu zawtfahnak cu hinak a let in karhchin a panh lai tihi chimchung khawhmi a si” tiah a chim. __AP

Ralkap Tlak Ah Aa Thawhmi ‘RAIN’


Thlanglei Korea ram in hlasa zong a si i fitlaw zong a simi Rain cu a rian chikkhat kaltak in ralkap tlak dingah 11/10/2011 (Cacawn Nihnihni) ah khan aa thawh. Kum 29 a simi Rain cu Seoul khua in chaklei ah a ummi Uijeongbu ralkap camp ah a lut cang. A luh lio zongah a mah a daw i tha a petu mipi hna he i thlahnak an ngei ta. Mitthli haa thliahmah in a ummi mipi cu ralkap salaam peknak in upatnak a pek hna i camp ahcun a kal. Rain a thlahtu mipi tam deuh cu Japan le Tuluk rammi deuh an si hna. Pum tlamtlingmi Korean pa paohpaoh cu kum hnih in kum thum tiang ralkap tlak ding timi upadi cu 1950 kum in an ngeih cangmi a si. Rain a min tak cu Jung Ji-hoon ti a si. Rain hi a tulio ahcun Asia huapin a min a laar bikmi fitlaw pakhat a si. 2008 kum ah khan Speed Racer timi in Hollywood ah baisakup a rak i thla bal fawn. —Online News.

MJ Cu Rak Khamh Khawh A Si Ko Hnga


Michael Jackson a thlopbultu siibawi nih 911 rak au sehlaw cu a nunnak a rak liam hnga lo tiah lungthin lei siibawi (Cardiologist) nih a ti. Dr Murray le a sih-ne hna nih MJ cu amah tein sii tam tuk a din caah a thihnak a si tiin biaceihzung ah an chim lengmang mi cu siibawipa nih a leh hna. "Kan nih American mi paohpaoh nih kan hngalh ciami cu 911 auh a si ko. Mi pakhatkhat mitkaa le hmaikaa ah a tlurilmi kan hmuh hna paoh ahcun 911 auh ding timi cu kan i cawnpiakmi a si fawn ko. Dr Murray zong nih thiam i cuh theng loin 911 tu rak au sehlaw Jackson zong a nunnak a rak liam theng lai lo" tiah lungthin lei siibawi Dr Alon Steinberg nih biaceihzung ah a chim. Dr Murray nih 25 June 2009 ah Mj sii ka chunh dih hnu ah minute 2 te zungput ah ka kal ta i ka rak kir ṭhan tikah cun MJ cu a thaw a rak cat deng cang tiah a ti ve. "Mizaw pakhat na thlopbul tikah an pawng in kaltak a ngah lo; a hlei in propofal na pek dih hnu ahcun kaltak a ngah lo ti cu na hngalh ko lai. Mahti na kal tak cu cokaa ah ngakchia amah lawng kaltak he pei aa lawh cu" tiah Dr Steinberg nih a leh. Kum 58 a simi Dr Murray nih cun Propofol (25 mg) hi MJ aa hngilh khawh deuhnak dingah ka chunh tiah a ti. Asinain siizung nih an checknak ah hi sii cu a pum chungah an hmu lo i lorazapam timi sii tu an hmuh. —Online News.

UEFA nih Euro 2012 chuihzuamnak ah aa telkho chungmi ram cazin a chuah


Poland le Ukraine ram nih inntek tuah an timhmi, Euro 2012 pumpululh chuihzuamnak ah aa telkho chungmi ram cazin cu UEFA nih thanhnak a tuah. A ralaimi Euro 2012 i telkhawhnak ding chuihzuamnak ah Europe ram 51 an i telkho. Hi chuihzuamnak ah 1nk a hmutu ram 12 nih telkhawhnak lehhmat (ticket) an hmuh chungcawlt i lehhmat 4 a taang. Turkey vs Croatia, Astonia vs Ireland, Czech vs Montenegro, Bosnia vs Portugal ramhna cu sungh-chuah chuihzuamnak in a taangmi lehhmat 4 i cuh dingin UEFA nih me-thlaknak in biakhiahnak a tuah. Chuihzuamnak ah 2nk a hmutu ram hna an i zuam dingmi, sungh-chuak zuamnak puai cu November ni (12, 13) le (15) ah chuihding in UEFA nih caan a khiahpiak hna. Inntek tuahtu Poland le Ukraine ram cu telkhawhnak a lak in pek an si. Hmaikum Euro 2012 pumpululh chuihzuamnak ah Europe ram 16 i tel dingin UEFA nih bia a rak chah. Group ṭhennak cu December 2 ah tuahding a si. Euro 2012 pumpululh chuihzuamnak ah aa telkho chungmi cu a tanglei ram hna hi an si.

Denmark……………. England…….. France
Germany……………. Greece …….. Italy
Netherlands………… Poland………. Russia
Spain ……………….. Sweden ……. Ukraine __ UEFA

Hernandez nih kum 5 chuihnolh dingin minsen a thut


Manchester United le Mexico hmaikal Javier Hernandez cu kum 5 chuihnolh dingin hnatlak minsen thutnak an ngei. Manchester United chungtel hna nih Hernandez cu a hlan ah zarhhlawh £25,000 a hmuh nain hnatlaknak thar an tuahchap ruangah £80,000 a hmuh cang lai tiah an chim. Asinain, Hernandez agent nihcun zarhhlawh zeizat a hmuh ticu fiangfai tein a chim duh lo. Manchester United nih mino pumpululh chuihthiam Cleverley le Welbeck zong zarhhlawh £40,000 tiang an karhpiak ve hna. Mexico hmaikal Hernandez (kum 23) cu 2010-2011 kum ah Manchester United ah aa thial i kawl 20 leng a kawl. Real Madird le vawlei cung club mirum tampi nih Hernandez cu cawk ding an mit thittuk ruangah Manchester United nih tubantuk in thialter a sianlonak cu hnatlak minsen thutnak thar a tuahchapmi he a lehrulh hna. Hernandez cu Chicharito tizong in an auh. Chicharito cu Spanish holh a si i pete (little pea) tinak a si. Pe 5 le Lehmah 9 a tung sangmi, Hernandez cu Manchester United Club ah hmasabik a chuihkhomi Mexican miphun zong a si. ___Goal.com

Thawngbultan

Man United - University of Manchester nih manager Ferguson (kum 69) cu upat hmaizahnak roca an pek.

Arsenal - A ralaimmi January micawk caan ah £50 million hmangin mithar cawk an timh.

Chelsea
- Club ngeitu, Abramovich nih certual (stadium) thar sak a timhmi cu John Terry nih a lungtlinnak kong a chim.

Liverpool - Club ngeitu thar, John W. Henry (kum 62) nih Liverpool Club ka cawk lioah Club kong tlawmte lawng ka theih tiah a chim.

Man City
- Puai 2 chuihlo dingin dantatnak an pekmi a dih cang nain Tevez cu club nawlngeitu hna nih dothlatnak tuahnolh an timh.

Chelsea - Russia club, Anzhi nih kehlei hnukham A.Cole (kum 31) cu zarhhlawh £200,000 pek dingin cawk an timh.

LA Galexy - David Beckham (kum 36) nih Director of Football dirhmun in Manchester United ah kirthan ka duh tiah a chim.

England
- Montenegro he an chuihnak puai ah kardsen (Red Card) an piak ruangah Rooney cu UEFA nih ram aiawh puai 3 chuihlo dingin dan an tat.

Chuih dingmi Puai le Caan


(16, October 2011, Serie A le EPL)
Tuzaaan Puai

06:30PM Cesena vs Fiorentina
09:00PM Atalanta vs Udinese
09:00PM Cagliari vs Siena
09:00PM Chievo vs Juventus
09:00PM Genoa vs Lecce
09:00PM Novara vs Bologna
07:00PM West Bromwich vs Wolve
08:30PM Arsenal vs Sunderland
11:00PM Newcastle vs Tottenham

Deilei Puai
02:45AM Lazio vs Roma

(19, Oct 2011, Champions League)
Cacawn nihnih zaan

02:45AM Dinamo Zagreb vs Ajax
02:45AM FC Otelul Galati vs Man United
02:45AM Lile vs Inter Milan
02:45AM Man City vs Villarreal
02:45AM Napoli vs Bayern Munich
02:45AM Real Madrid vs Lyon

(20, Oct 2011, Champions League)
Cacawn nithum zaan

02:45AM Barcelona vs Viktoria Plzen
02:45AM Chelsea vs Genk
02:45AM FC Porto vs APOEL Nicosia
02:45AM AC Milan vs BATE
02:45AM Leverkusen vs Valencia
02:45AM Olympiacos vs Dortmund
02:45AM Marseille vs Arsenal

(22, Oct 2011, EPL le La Liga)
Hmaizarh zarhte zaan

07:45PM Wolve vs Swansea
10:00PM Aston Villa vs West Brom
10:00PM Bolton vs Sunderland
10:00PM Newcastle vs Wigan

Deilei

12:30AM Liverpool vs Norwich
02:00AM Malaga vs Real Madrid
04:00AM Barcelona vs Sevilla

HRW: Ramkhel Thongtla An Luat Dih Rih Lomi Hi Cu A Poi Ko

Kawlcozah nih kan hnu October 12 i thongtla pawl a chuahmi hna kongah nuhrinvo a hlathlaimi buu hna nih kan lunglawmhpi hna nain a chuah hnga dingmi ramkhel thongtla vialte a chuah dih hna lo ruangah lungrawk ngai a si rih tiah an chim. Ramkhel thongtla vialte chuah dih dingin le ramchungah nuhrinvo kongah zalonnak taktak a um khawhnak hnga phunglam hna remh dingin Kawlcozah cu an forhfial. Kawlcozah nih ramchungah dothlennak taktak ka tuah ko tiah langhter a duh a si cun ramkhel thongtla vialte hna hi a chuah dih hna awk a si. Kan i ruahchanning bantuk si loin ramkhel thongtla pawl a chuah dih hna lo hi cu lungrawk ngai a si ko tiah Human Rights Watch (HRC) hruaitu a simi Elaine Pearson nih a chim.

UNO nih Kawlram nih nuhrinvo a buarmi kong hlathlaitu dingah palai a hmanmi Tomas Qjea Quintana zong nih ramkhel thongtla pawl a chuahmi hna an tlawm tukmi hi cu ramzakip nih kan i ruahning bang a si lo tiah a chim. Kawlram ramkhel kong hlathlainak a tuah i, Kawlram nuhrinvo kong a theihngal ngaimi Benjamin Zawcki nih cun Kawlram chungah hi cu hlante in ramkhel thongtla an rak um awk hmanh a si lo tiah a chim.

"Ramkhel thongtla vialte a chuah dih ding hna hi a biapi ngaingaimi a si. Mipi hna nuhrinvo kong le ramchungah zalonak taktak a um ko ti langhternak dingah cun Kawlcozah uknak phunghrampi hi an remh a hau," tiah nu nih an chuahmi cathluan chungah an langhter. Kawlcozah nihhin cu hlan zongah ramkhel thongtla pawl a hmaanlo ningin an rak thlaih hna. Mahhi a hmaanlomi an phunglam pawl hi thlennak taktak ka tuah ko an ti si cun an thlen awk a si. Nuhrinvo kong he pehtlai in mipi nih chimphuan an duhmi hi zalong tein chimphuannak nawl tbk an pek lonak hna phunglam pawl an thlen a hau tiah Elaine Pearson nih a chim. —BBC

Kawl-Tuluk Pehtlaihnak A Zor Lai Lo


Irrawaddy tikham an ngolmi hi Kawlram nih Tuluk hi rulhnak bantukin riandang ṭuanter dingin a timhtuah piak ṭhan men hna lai tiah Kawlram president Thein Sein ruahnak petu Dr. Ne Zin Latt nih a chim. "Irawaddy tikham an ngol ruangah rulhnak cu an pek ko hna lai, tangka fang in Kawlcozah nih a liamh hna lai lo nain riandang ṭuanpi dingin timhtuahnak an ngei," tiah Irrawaddy thawnglatu hna sinah a chim. Asinain, Tuluk company pawl hi zeibantuk rian phun dah ṭuannak a pek ṭhan hna lai timi kong tu hi cu zeihmanh a chim chih lo.

"Irrawaddy tikham an ngol ruangah hin Kawl-Tuluk pehthlaihnak hi chiatlei a panh hlei lai lo. Tuluk nih Kawlram ah hrambunh in rian an ṭuanmi hi tampi a um. Natural Gas lakding timhtuahnak an ngeihmi hi ngol an tim lo," tiah Ne Zin Latt nih a chim. Irrawaddy tikham ngol ding Thein Sein nih thawngthanhnak a tuah hnu in Tuluk nih Kawlram ah hrambunh in rian a ṭuanmi hna lak Rakhine ramkulh Coh Phyu khua i Natural Gas lakding hi biapi bik ah a chiahmi a si.

Mahhi Irrawaddy tikham kong he pehtlai in a bikin rianṭuan hram a domhmi company hi Tulukcozah nih an ngeihmi China Power Investment (CPI) hi a si. CPI company i vice chairman Mr Lu Qizhpu nih,"mahhi tikham ngol ding an timhmi kong he pehtlai in Kawlram nih rulh ding kong hi cu vawleicung phunglam ningin kan tawlrel lai," tiah China Daily thawngzamhca nih biahalnak an tuahmi ah a chim. "Mahhi tikham ruangah hin Tuluk-Kawl pehtlaihnak hi zeihmanh chiatlei a panhter hlei lai lo. Tuluk palai hna le Thein Sein tonbiaruahnak an ngeih lioah Thein Sein nih ṭha tein a hrilhfiah ko cang hna," tiah Ne Tin Latt nih a chim. —Irrawaddy

Phungki 2 Kawlram ah an kir


Kawlrammi ramleng ummi hna an kir kho cang tiah Kawlram president Thein Sein nih thawngthanhnak a tuahmi a ṭhatnak lei hmun in an zumh ruangah Thailand ramri ah ralzaam dirhmun in ai dormi, Kawl phungki 2 hna cu kan hnu October 12 ahkhan Myawaddy lei in Kawlram ah an kir. Mahhi phungki 2 hna hi ramkhel kong he pehtlai in ralkapcozah nih tlaih a rak timhmi hna hi a si i, Thailand-Kawl ramri Aum-Phan Camp ah ai dormi an si.

"Kawlcozah nih ramleng ummi hna kirnak nawl ka pek hna tiah thawng thanhnak a tuahmi hi kan zumh ruangah atu bantukin kan kirnak hi a si. Kawlcozah nih thlennak an tuahmi hi a ṭhatnak in kan hmuh ruangah a si," tiah phungki 1 nih a chim. Mahhi phungki hi 1988 kum lio Kawlram buaibainak ruangah an rak tlaih i thah dingin biakhiahnak an rak tuah nain thih hlanlo thongthlak dingin an rak thlen piak ṭhan. Kum 10 thong a tlak hnuah Kawl biaknak lei ah a luh ruangah 2009 kum donghlei ah ralzaam buk hi ka phaknak a si tiah a chim.

"President Thein Sein nih a chimmi bia hi kan zumh ruangah kan kirnak hi a si. Kawlram ai thlen taktak cang ko lai. Suu Kyi le Aug Kyi zong tonbiaruahnak an ngei kho cang. Cu lawng hmanh si loin mipi duhnak zul in Kawlcozah nih Irrawaddy tikham zong a ngol cang, mahhi pawl hi thlennak ai thoknak hrampi an si ko," tiah a phungki pakhat nih a chim. 2007 kum phungki hruainak in Kawlram ah lamzawh aunak ruangah ralkapcozah nih an dawi i ralzaam buk nunhimnak kawl in a rak i dor vemi an si. —Irrawaddy

Kachin ralzaam pawl zawtnak nih a den hna


Kachin hriamtlaibu KIO an umnak sakhan Laiza ah nunhimnak hmun ah ai dormi Kachin ralzaam 400 renglo hna cu an dam lo ruangah nifatin an damnak ding kongah kan zohkhenh/ thlop hna tiah KIO nih an chim. Kan hnu June thla thokka in Kachin ramkulh chungah a cangmi raltuknak ruangah ralzaam dirhmun in minung 12000 hrawng an um tiah KIO vice chairman La Nan nih a chim. A zualhma tuk cu an si lem hna lo, sii din in an dam kho hna nain nifatin mizaw hi 400 hrawng cu an si peng ko tiah a chim chih. A zawmi hna i ngakchia le tar deuh an si hna i kuh le raifanh zawtnak deuh an si.

"Ngandamnak kongah hin cun lungrethei ngai kan si ko. Ka hin cun rawl le meh phun khat (meh tlawmte) lawng kan ei khawh tikah an pum nih a herhmi vitamin a bau ruangah atu bantukin an zawtnak hi a si," tiah La Nan nih a chim. A zawmi hna hi Laiza ah a phanmi ralzaam deuh an si. Hmundang i ai dormi hna hi cu a zawfakmi an um theng lo. "Laiza ah a phanmi ralzaam hna ahhin sianginn kai dingmi ṭhi hi minung 1000 renglo le fapawimi 180 hrawng an si," tiah siangcachim saya pakhat nih a chim. KIO an umnak hmun ah ai dormi ralzaam hna an dihlak ah minung thongkul renglo an si.

Kachim ramkulh Myitkyina khua le Win Maw khua i a ummi chungkhat rualchan hna sin le biaknak lei inn hna ai dormi ralzaam pawl zong an um hna. Mah cu ralzaam pawl hna cu KIO le ramri biakinn hna le a dangdang buu hna sinah bawmh an hal hna cu ti cun kan bawmh hna tiah KIO nih an chim. Kawlram chung eidin tirawl a bawmtubu WFP, International Committee of Red Cross (ICRC) hna le NGO tampi an um ko nain Kachin ralzaam pawl hna hi bawmh dingin pehtlaihnak zeihmanh an tuah hna lo tiah Thailandram hrambunh Kachin Women Association Thailand (KWAT) nih kan hnu thla ahkhan an rak langhter. Kachin ralzaam hna hi ramzakip nih bawmh khawh lo dingin Kawlcozah nih a phihkham hna tiah KWAT nih a chim. — Irrawaddy

KIO: Kanmah Ta A Si Lo

Kan hnu October 11 i chuahmi Kawlcozah thanhca, New Ligth Myanmar nih a ṭialningah, Mose peng i Takanah khua ah Kawlralkap nih October 8 ah an tlaihmi sii-ṭhalo hna hi KIO ta a si tiah an ṭialmi kong he pehtlai in KIO hriamtlaibu nih mahhi hi kanmah ta a si lo tiah lehrulhnak bia an chim. Mahhi sii-ṭhalo an thlaihnak hmun hi Canphio inn lianpi chungah ah a si i lungthawhternak sii dar 1020 le KIO hmelchunhnak ai telmi uniform pakhat, cun mahhi an tlaihnak inn kam, inn pakhat ah lungthaehtetnak sii-ṭhalo dar 521,340 an tlaih chih.

"Sii-ṭhalo a zuar i tlaih a tongmi hna nih hin Kawlralkap cu tangka an pek hna i an thlah ṭhan peng ko hna. Hika hmun hi kan hmunhma zong a si lo," tiah KIO battallion 4 an hruaitu a simi Zaw Yaw nih a chim. Kyuat Khin hrambunh in a ummi ramṭhen uktu Shua Haw le ralbawi Lon Htang hruaimi ralkapbu nihhin an zuarmi a si tiah Zaw Yaw nih a chim.

KIO nih siiṭhalo an zuar ruangah kan tuknak hna hi a si tiah chirchanh lak an duh ruangah atu bantukin kanmah an kan puh hi a si tiah La Nan nih a ruahdamh. 2009 kum lioah Phung Ka Sin hruaimi NMDAA timi Kukanh hriamtlaibu hna cu Kawlralkap nih siiṭhalo kan kawl tiin an rak tuk hna i NMDAA hriamtlaibu zong cu atu tiang an lo tlau thai. —Mizzima

Thongtla 6359 An Chuah Hna

Kawlcozah nih kan hnu October 12 ah Kawlram chung thonginn hmunkip in thongtla 6359 a chuah hna i, ramkhel thongtla 300 hrawng an i tel tiah Nyapyidaw thonginn rian ngeitu a-za-sih pakhat nih a chim. October 12, kan hnu Cacawn nihnih ni lawngah thongtla 6359 hi a chuah hna hi a si. Insein thonginn lawngin thongtla 400 renglo an chuah tiah Nyapyidaw thonginn a-za-sih pakhat nih a chim chih. Thailandram hrambunh thongtla pawl a bawmtu hna bu AAPP nih cun thawng kan hlat khawh tawk ah ramkhel thongtla 206 hrawnglawng an si tiah an chim.

Mandalay chungah a ummi Oo Bu timi thonginn in thongtla 409 an chuak i mahhi chungah hin Khin Nyunt chan lio i Kawlram ngiathlaibu ah bawi a rak ṭuanmi pakhat le ramkhel thongtla 46 an i tel tiah Ko Ko Lay nih a chim. Ko Ko Lay a chimning ah Mandalay thonginn in a chuakmi hna ahhin NLD chungtel a simi Mandalay ramṭhen chungah hruaitu pakhat a simi Hla Soe, KIO kong he pehtlai in thong a tla vemi phungki Than Aung, tbk ramkhel thongtla pawl an i tel tiah a chim.

Kawlram president nih a chimnak ah cun kumkhua upa cangmi hna, pum tlamtling lomi hna le a ngandam lomi hna cu chuah dih dingin thawngthanhnak a tuah. Nain, Oo Bu thonginn chungah a ngandam lo ngaimi 1988 kum lioah sianghngakchia hruaitu a simi Hla Myo Nawng le kumkhua upa ngai cang phungki pakhat zong an tang rih ko tiah Ko Ko Lay nih a chim. —BBC

India; Kawlram thlennak ka cohlan


Kawlram cozahthar nih thlennak an tuahmi hna hi kan cohlan tiah president Thein Sein nih Indiaram i hawikomhnak tiin a tlawn hna lioah India PM Dr. Manmohan Singh nih a chim. Kawlram cozahthar democracy lei ah thlennak an tuah lioah an herhmi bawmh dingin India hi timhcia kan si ko tiah a chim. Atu ah Kawlcozah nih ramchung thlennak, chawlehthalnak kong le mipi ṭhanchonak dingah an ṭuan liomi kongah kan conghlawmhpi hna tiah a chim. Thein Sein hruainak in Indiaram ah a tlawngmi hna Kawlram hruaitu hna nihhin India PM lawng si loin ramleng vuanci le humhimnak vuanci hna zong tonbiaruahnak an ngeih hna i science fimthiamnak lei ah rianṭuanṭi dingin hnathlak minthutnak zong an ngei. Mahhi minthutnak 2010 kum ah an rak tuah cangmi a si i 2012-2015 tiang rianṭuanṭi dingin minthutnak an tuah i Kawlram fimthiamnak a cawngmi hna zong Indiaram fimthiamnak cawng dingin thlah ding kong zong hnatlaknak an ngei chih.

Yangon khua chugah ngakchia siizung le Sittwe khua i siizungpi hna zong ṭhanchoter deuh in hnatlaknak an ngei. Mahhi tonbiaruahnak an ngeihmi ahhin ramri humhimnak, India rammi hriamtlaibu hna hrawhhral ding, ramri humhimnak ṭhanchoter ding, phung ning loin hriamnam le siiṭhalo a zuarmi hna dohṭi ding kong hna biatak in an i ceih bikmi a si. Ramhnih pehthlaihnak a feh deuhnak dingah Kawlcozah nih Naypyidaw khua ah India cozah cu vawilei-hmun kum 60 chung hlanh dingin le India cozah nih Kawl biaknak he ai pehtlaimi sianginn saknak dingah vawlei-hmu pe 220 velchum a kaumi an pek ve hna lai. —Irrawaddy

KHUALIPI PAHNIH

R. Siang Nawl

Biahmaiṭhi
“Nannih cu Vawlei Cite le Ceunak nan Si” ( Matthai 5:13-16) tiimi hi voi tam nawn phung ah ka chim cang. Cite cu dawtnak kong a si i ceunak cu dinnak kong a si. Kan nunnak ah hin dawtnak le dinnak hi a biapi bik an si. Dawtnak le dinnak a umlonak hmun cu buainak le hnahhnawhnak in a khat.

Mah kong ṭial ding in ka lung ah a hung chuah cu 2008 August 31 Zarhpini ah ka hawipa Rev. Bawi Uk pastor a ṭuannak Yangon Zotung Baptist Churh, Khaweigyan, i phung ka chimnak in a si. Mah Baibal caang chirhchan in ka rak chim. Mah lio cun dawtnak le dinnak in a khat i mi tampi nih an zohchunhmi khualipi kong ṭial ding ka thintung ah a hung chuak. Zeitin dah ka ṭial lai tiin khuazaza ka ruat.

Ka lung mitthlam in khual ka tlawng i Pathian duhnak a tlinnak khualipi le Satan leennak khualipi ka phaan. Cu khualipi pahnih hna cu Duhdimnak Khualipi le Duhcuainak Khualipi an si. Duhdimnak Khualipi cu dinfelnak (righteousness), duhcuainak (justice) le dawtnak an umnak khualipi a si. Mah bantuk khuatlang ah cun minung khuasak a nuam, thla a ngam, lung a dai, duh a tling. Sihmanh sehlaw, minung duhfahnak le nuamh duhnak in a khatmi Duhcuainak Khualipi ah cun, minung hna cu an duh a faak, an haak a kau, nuamh ceen an duh i sualnak a tam. Sualnak a tam caah ṭihphannak in a khat, thla ngamnak a um lo.

Hi cauk cu dal thum ah ka ṭhen. Dal khatnak ah dawtnak le dinnak a leennak duhdim nunnak kong a si. Dal hnihnak ah cun, duhcuainak tiimi duhfahnak le nuamh cennak in a khatmi nunnak kong a si. Cucu khualipi phunhnih in ka langhter. Dal thumnak ah cun thih hnu nunnak kong a si. Khrihfami nih kan vaanram le hell ram a um ti kan zumh i , biaceihnak zong a um te lai ti kan zumh fawn. Cu kan zumhmi cu drama hmanthlak in ka lung mitthlam ah ka suai ka langhter.

Minung pakhat cio i kan thinlung chung ahhin khualipi pahnih a um cia cang—dinnak khualipi a um i sualnak khualipi a um. Nannih cu tlaang cung i tlaakmi khualipi bantuk nan si. (Matthai 5:16).

Hi cauk timhtuahnak caah, hlaan i ka rak rel bal mi cauk cheukhat pawl cu a tanglei hna hi an si.

Dietrich Bonhoeffer, 1953, The Cost of Discipleship New York: SCM Press.
Dietrich Bonhoeffer. 1971. Letters and Papers form Prison. New York : SCM Press
Fulton J. Sheen, Life of Christ.
Stoott, John, 2006. Issues Facing Christians Today (Paperback)

Mah pin ah Cauk dangdang zong an i tel. Baibal Thiang chung in Isaiah, Jeremiah, Ezekiel, Daniel, Zekhariah, Micah, Malakhi, Matthai, Johan, Biathlam te hna hi an si.

DAL 1

Duhdimnak Khualipi


Cun Khuathiang tiimi kha ka hmuh i tlaangchung ah cerh zengzung in aa suang ko. Cu khua cu “Dinnak Khualipi” tiah an kawh. Cu Khualipi chung i a ummi Bawithutdan in aw pakhat ka theih i, “Pathian umnak inn cu minung hna sinah a um cang. Anmah sinah cun a um lai i annih cu a mi an si lai. Pathian hrimhrim cu an sinah a um i Amah cu an Pathian a si,” a ti. Thlarau nih cun a ka tlaih i vancungmi nih khan tlaangsaang pi cungah a ka kalpi i cu tlaangcung i khualipi pakhat kha a ka hmuhsak. Cu khua cu Khuathiang a si i Pahtian sunparnak vancung in a rung ṭum khi ka hmuh. Cu khualipi cu Pathian sunparnak in a cer i lungmansung jasper lungvaar bantukin a tleu i thlalang bantuk in a fiim.

Ka hmuhmi khualipi cu a min dah Duhdimnak Khualipi ti a si. Minung nih duhdim te in khua an saknak khualipi, hnangam lungdai in an ṭhutdirnak khualipi, dinnak, zaleennak le zumhtlaaknak a leennak khualipi a si. Duhherh vialte tlaamtling te in an hmuh khawhnak, sifaak rethei hmanh an duh a dimnak khualipi a si. Minung lawng si lo in mah khualipi pawngkam um ramtlongsa hna le tichung saram hna duhdim te in an tlonleennak ram a si. Innzuat saṭil arva tiang nih duhdimnak an cotin. Cucaah hi khualipi cu a min ah Duhdimnak Khualipi (City of Abandance) ti a si.

Khualipi pawngkam
Mah khualipi a chak ah cun tlaangthluan saupi pakhat a um i, a min ah Duhdimnak Tlaang an ti. Cuka tlaang cu tupi hmawng pi in a khuh dih. Mah Duhdimnak Tlaang ah cun saram phun tling khua an sa i, zeihmanh ṭih awk le phaan awk um lo in, eidin awk tirawl kongah thlaphaang lo in, an duhmi tirawl kha duhdim te in an hmuh khawh. A thingkung cu an ngan, an saang tuk, hring deldul in zoh an dawh hringhran.

Vancungmi nih cun a ka chimh i, “Khi thingcuun þhaþha pawl khi minung caah ṭhathnemnak a petu an si. Phundang in chim ahcun, khi thingkung hna khi nunnak thingkung pei an si cu. Nunnak thingkung ti tikah mithi a nuntertu ti in a sullam laak leem lo in minung le saram nunnak a petu tinak deuh a si. Thingkung um lo ahcun, minung le saram hna hi an nung kho lai lo; cucaah thingkung cu nunnak thingkung an si ti khawh a si. Baibal i Genesis ah khan Eden Duum ah Pathian nih nunnak thingkung a rak chiahpiak hna kha. Kan nunnak ah kan herhmi thaw oksizen (oxygen) chuahtertu kan nunnak kungpi an si. Thli thiang a kan petu lawng si lo in, zildai a kan petu zong an si. Thingkung hi saram le minung caah nunnak petu an si ti hi minung nih an rak hngalh hlaan pi ah Pathian nih Eden Duum ah a rak chimh cang hna.

Hi thngkung hna cu minung nunnak an si caah mi nih an nunnak an i dawt bantukin an dawt ve hna i fahnak an pe hna lo. Mei zong an duahhnawh bal hna lo. A hawng themh, a herh lo ah cik, a nge thlangh zong an hmang lo. Cucaah mah thingkung hna nih hin thli thiang an run kuat hna i minung caah a herh lomi thli thuur (carbon dioxide) kha annih nih an i laak i, cuticun minung le saram vialte cu nunnak thaw an peek hna,” tiah a ti.

Vancungmi nih cun, a hun i peh rih i, “Hi khualipi mi hna le rammi vialte nih an thingram an kilven. Mei ral an venpiak. Mei a kangh sual ahcun, aho hneek le fial hau lo in, tlangval le pachuak paoh cu an nunnak thaw petu thingkung chanh awkah an chuak cio i luklak ah mei cu an phalh dih. Cuticun tivakam a khomi thingkung bantuk in hi khualipi kam i a khomi thingkung hna cu zeitikhmanh ah an hnah an uai bal lo; an hnah an hring zungzal i minung le saram caah nunnak thaw thiang duhdim tein an peek hna.

Hi tupi chung ah cun tlaang saram phun tling an um. Ramtlongsa phun tling cu zalen tak in le phaannak ngei lo in an tlong. Mah saram hna nih cun, minung kha an ṭih hna lo i, ral ah an ruat hna lo. Mah tupi cu kokek saramduum ah an hman. Pathian nih a rak chiah ning te in a ummi saram tlonnak hmun a si caah “Zingser Saramduum” tiah an ti. Cu tupi ah cun saram pawl din-ei awk ramhnah phun kip an kho i an din awk cerhtipuut le tidil tam pi an um. Cu hmun ah cun ramsa an duh a dim. An thla a tla i an ngam. Minung ralveen awk a um lo; an caah minung cu ral an si ti lo; an himnak bawmchantu an si lehlam. Cu hmun cu saram caah zalen pennak (kingdom of freedom) tiah ti khawh a si. Saram nih phaan awk an ngei ti lo. Ram-eisa (ram a eimi saram) pawl—sazuk, neengpi, sakhi tbk—pawl cu an tamluan (overpopulated) nakhnga lo tu kha minung nih an tuaktaan. Sasehhmang (ramsa a eimi saram) pawl—cakei, sahngar, chiandeih, tbk—pawl caah a zatawk in ramsa an um peng i annih pawl zong rawl ṭaam in zaan an riak bal lo. Pathian nih ningcangtlai te in a rak ser ning te in le minung nih zohkhenhnak thawngin cu “Zingser Saramduum” cu tlonleennak ah a nuam hringhran. Sasehhmang pawl tu kha cu minung caah ral an si sual lai ti phaan ah thirkiam kau pi chung ah an khumh hna i ṭihphaan awk a um lo. Alang in zoh ahcun minung caah seh ai tiimmi phun cu an lo ruam lo. Cu Zingser Saramduum ah cun ngakchia upa thlulo in an kal cio. Ngakchia zong nih khan sasehhmang cakei pawl hmanh kha an ṭih hna lo.

Duum chung i va luh lecangka in zawng ngau pawl nih an zapei an rak dawnh i banhla le eidin dangdang an rak hal lio hna ngakchia nih an hmuh tikah cun an i lunghmui hringhran. Ngakchia nih khan zawng tepawl kha rawl an peek hna i, sahraang pawl kha rawl an tuh hna. Mah tupi cung i a ummi tlaang ah dinhdamhnak (recreation) hmun phunphun an tuah i, pum rethei pawl, lungrethei pawl hna nih lungdaihnak an hmuh. Cu saram hna nih cun minung an hmuh hna tikah ral ah an ruat hna lo; anmah a zuatu hlah maw an si ti awk in an ngamh hna. Minung nih saram pawl cu hawikom ah an ser hna. Mah hmun cu “Eden Thar” ah a cang.

Cuka Duhdimnak Tlaang cung cun tihna tampi an puut i khuachung ah siseh, khuapi kiang ah siseh, an luang i, a thlang ah tili kaupi pakhat ah an i tong. Cu tili cun tivapi pakhat aa seem i, cu nih cun, khualipi chung mi vialte caah thathnemnak tampi a peek hna. Mah Duhdimnak Tlaang min chuankhaan in a tang i a ummi khualipi thar cu Duhdimnak Khualipi ti ah an kawh.

Duhdimnak Khualipi a si bantuk in a khuachung mi hna cu duhdim te in an um. A chung saram zong an duh a dim. Titlongsa le ramtlongsa vialte nih duhdim te in tirawl an hmuh. Innzuat saþil hna zong duhdim te in tirawl an peek khawh hna caah, minung ciinmi thlairawl cung ah hnahnawhnak an pe lo. — Pehṭhan ding...

ZEIRUANG AHDAH MIPHUN DANG VAT KAN ṬIH LO?

Salai Ram Nun Cung

A luancia mi thla zeimawzat hrawng ah mi thinlung a tawng ngaimi le a theitu dihlak thinlung chung ah meikangh bantukin a lin i a hmape hmanh tlau kho loding tluk tiang in fahnak pe kho tu thawngpang pakhat a thangmi cu USA ram ah ralzaam dirhmun in a kalmi Lainu nih Kawl cozah he pethleihnak a ngeimi Kawlpa pakhat (spy) a benhmi an tleih ti a si. Cunih a chuahpi mi cu kan Chin miphun chung in le a dang tlangcungmi hna tampi USA lut dingin an timhlamh cangmi hna zong an khirh dih hna tiah thawng a hung thang ṭhan.

Caan tlawmpal hmanh a rauh hlan ah, ka hawipa nih a ka chimh mi cu Lainu pahnih an rianṭuannak ah Kawlpa an i cuh ti a si. Hi Kawlpa hi Lainu pakhat he hin caansau nawnpi an i kom cang nain a rianṭuanṭi hawi nu te nih a duh i a helhpiak le an piat caah anmah Lainu pahnih cu fak ngai in an i si tiah a chim chih.

Nai hrawng cu kan biaruahnak Forum te hna vun zohtik ah Lainu le Laipa kong tam ngai kan hmuh. Kan miphun chung, a hlei in kan mithmuh le kan pawngkam i a hung can tikah thinlung ne a tongh i khuaruah lo awk a ṭha hrim lo. Hibantuk thil hi miphun dang dihlak zong nih ton cio mi a si tiah chiahsawh awk a ṭha hrim lo. Kan miphun cung i a hung phak tikah kan miphun zeitluk in dah thlennawnnak (affect) a tuah tihi ruah lo awk a ṭha hrimhrim lo. Asicun, zeiruang ah dah hi bantuk thiltuah hi a ṭih awk kan theihlo i kan cung ah a can lengmang timi a fawinak bik in a tanglei ah kan zoh tuah lai:

Ṭhit-um timi le Nuva tihi zeidah a duhnak a si?

Ṭhitum = Mi pakhat caah chanchung in i pekchanhnak
Nuva = Pakhat le pakhat karlak ah i pekchanhnak le cohlannak

Ṭhit-um asiloah nuva timi nih a sawhduhmi le kan lung a fian ning cio chim usihlaw kan hmuhning, kan theihning le kan tonning ai dang dih lai tiah ka ruah. A ruang cu sining, umnak, lungput le ruahnak tbk ai khat bal lomi minung pahnih nih hmunkhat ah sermi “ṭhitumnak” hi minung dihlak khahter khawh dingmi thil fate a si lo. Thil liangan taktak a si ve.

Asinain, mi vialte nih nu le va karlak ah ai khat tein tuahdingmi thil hna an um i cucu nihin kan miphun nih kan theihhrim an herh. Kan Lainu tampi nih mah miphun zaamtak in miphun dang pa an vatnak le Laipa nih Lainu te hna tbk ruahnak a chuahnak, a langpar in nupi ṭhitnak (parcel) te hna a chuahnak hi pakhat le pakhat kan karlak ah i theihthiamnak a bau caah a si. Cu a chambaumi cu kan theihṭhan khawhnak ding le a umṭhan khawhnak ding ah cun nuva a si cangmi nih pakhat le pakhat kar ah zeidah ṭuanvo ka ngeih, siloah ṭhitumnak sullam kan theih hrim a herh. Cucu zeidah an si? A fawinak bik in kan zoh tuah lai.

Nuva kan titik ahhin nu le pa sualnak lawng a chimduhmi a si loh i nu le pa sualnak lawng nih hin inchungkhar nuamhnak tling taktak zong a chuahpi zungzal kho lo. Nuva timi i a sawhduhmi taktak cu “pekchanh le cohlan” (give and take) a si i ṭhitumnak nih a langhtermi cu “mi pakhat caah nunchung i pekchanhnak” “lifelong commitment for someone” hi an si. Mah hi pahnih tling tein a umnak le nuva karlak ah theihthiamnak a um hnu lawng ah chungkhar nuamhnak a tling. Cuve bantuk in, nihin nungak le tlangval zong nih kan thinlung chungah hithil pahnih kan chiah a si ahcun mah miphun hawi ṭhitduhnak le vatduhnak thinlung a um kho lai.

Asinain, Mah hi sullam pahnih hi nihin Laimi kan karlak ah a nun khawh lo caah thinlung fak khun in kan i ṭhen, miphun hmanthlak kan chiat ter lawng sitiloin chanchung tiang i huatnak le kap hnih chungkhar karlak ah i remlonak tiang a chuak tawn.

Nihin kan miphun zohtik ah nuva karlak ah remlomnak tampi a chuak i Lainu tampi nih miphun dang kan vat (a hlei in Kawlpa kan vat bik hna). Mah hi kong ruah tikah thinlung a fak ngaingai. Duhnak cu a hohmanh nih kham ding a si lo kan ti ko nain Kawlpa nih hin kan chanchung an kan duhtak in, a thinlung dihlak he an kan daw-tak hnga maw ti cu a ruahawk kan hngal hmasa tawn lo. A hlei in fa ngeih hnu te hna i Kawlpa nih Lainu an nupi an vun ṭhen hna ahcun thinlung fah a zual khun.

Hibantuk buainak a chuahnak a ruang hi hlathlai tikah Lainu zeimawzat nih pakhat kan i palhmi ruahnak a um ve. Cucu, va ka ngeih ahcun ka va nih ka duhmi cu a ka tuahpiak ding a si tbk ruahnak kan ngei. Kawlpa cu miconglawmh an thiam, an mi zohkhenh a ṭha tbk tampi kan chim len tawn nain a donghnak tiang taktak ah cun mah miphun hawi vat a ṭhatdeuhnak kan theih ṭheu tawn. Miphun dang pa nih an kan dawt kho ding tiang in pekchanhnak kan tuah bantuk in kan miphun hawi Laipa cungah tuah ve sih, zumhtlak tein um ve sihlaw kan Laipa te zong nih kan caah dawtnak a ngeih hrimhrim ko lai.

Dawtnak lawng siloin ruah ding pakhat a biapi ngai rihmi cu Khrifa zumtu pakhat a simi nih mah biaknak phung ning tein ṭhitumnak puai tuah khawh lo zong hi ruah sepmap ahcun lung a ṭha lem lai lo. Kan chuah ka tein nu le pa nih Pathian sin ah pekchanh mi kan si bantuk in kan i ṭhitumnak zong kan Pathin hmai ah a si awk hrim cu a si.

Cucaah, Khrihfa ai ti vemi miphun he pehtlai in zoh ahcun parcel in nupi kan ṭhitmi te hna hi a sual (nupi cawk he ai lo ngaingai), parcel ruangah Lainu dignity a tla i Lainu nih Laipa sin ah zumhnak tling an ngei kho lo, nu le pa nih kan fanu nih zei bantuk harsatnak dah a ton khawh ti ruat lem loin an duh bal lomi hna phaisa hmuh duh ah kan vat ter hna ruangah kan miphun chungah chawva duhnak thinlung a lut chinchin i nehsawhnak thinlung a karh ter.

Hi thil vialte hi kan miphun chung ah khamawk ṭha loin a can cuahmah tikah a cannak hram kawl hmasa i kan miphun ning in kan i kham a hau. Asi khawh ahcun, dothlatnak le hlathlai nak (research & investigation) tbk hna tuah i mipi nih miphun dawtnak thinlung an ngeih khawhnak deuh ding ah campaign tbk hna tuah khawh ahcun tampi a kan chanh lai. A hlei in nihin Laica in a chuakmi cazual pawl fakdeuh in kan ṭan a hau i kanmah miphun kong tamdeuh in kan ṭial a herh. Nihin kan cachuak tampi zoh tikah kanmah miphun thawngpang nak in ramdang thawngpang a tam deuh. Cucaah, careltu nih miphun dawtnak thinlung a miak a hmu kho lo. Theihtlei (knowledge) ca sawhsawh lawng ah reldeuh a si. Kanmah thawng lawng kan ṭial ahcun a zuarnak hmun a bideuh kan ti tawn, nain zeithawng kan ṭial hmanh ah kan zuarnak cu Laimi sin a si ko caah Laimi nih theih duhbik mi cu kanmah miphun chungah a cangmi thawngpang hi a si ko.

Nihin mino nih mah miphun tleihchannak an ngeihkhawhnak ding ah fimchimtu cathluan, miphun nih ton taktak mi kong tbk kan ṭialdeuh a herh. Chim duhmi cu ramdang ah a cangmi thawngpang lawng nih kan thinlung tawne a tawng kho thlu lai lo. Cucaah, nihin kan Chin media pawl nih mino hna lungfim khawhnak ding cathluan pawl tamdeuh in ṭial khawh kan i zuam ngaingai a herh! Kan theihmi a tlawmtuk caah miphun dang pa vatduhnak thinlung tiang kan ngeihnak hi a si.

Cucaah, a ṭhangchomi le pakhat le pakhat ai tleihchan khomi miphun kan si khawh venak ding ah, fimchimtu caa tampi kan rel a herh i miphun nih cohlan khawhlo mi thil a tuahtu an um tikah a tuahtu mawhphurh nak in a chuahnak hram kawl in hmailei caah khamnak tuah ah a ṭha bik...

51. URMAR IBN AL-KHATTAB (AD 586 – 644)

Urmar Ibn Al-Khattab cu Muslim Khalifa upa vialte lakah pahnihnak Khalifa (asi loah) rumra a ngei bik Khalifa pakhat a si. Amah hi lamkaltu Muhammad he chankhat chuak mino pakhat a si i lamkaltu bantuk in Macca khua ah a rak chuak. A chuah kum taktak cu hngalh a si lo i 586 kum ah a si lai tiah ruah damh a si.

Umar cu Muhammah le Islam biaknak kha a rak dotu le a huabik tu Islam ral a rak si. Asinain ruah lo piin Islam biaknak kha a rak cohlan tikah cun Islam biaknak caah a ṭhawngṭha bikmi rianṭuantu ṭha a rak si. Pual Khrihfa biaknak i aa rak i thlennak he kan tahchunh ahcun cinkenawk thlak taktak a si. Umar cu Muhammad he aa naihniam bik minung le rinhchanmi minung a rak si i Muhammad he an nun chung kut tlaih in rian an rak ṭuanṭi.

632 kum ah Muhammad nih amah changtu ding minung rak chia cia loin a nunnak a rak liam. Umar nih Muhmammad he aa niahniam bik a hnuzul a si i Muhammad a pu (a nupi a pa) zong a simi Abu Bakr kha hruaitu dingah a thimpi hna. Hi ruangah nawlngeihnak i cuhnak le buaibainak pakhat hmanh a rak um lo. Abu Bakr cu a hmasatbi Khalifar (Mohammad a chaangtu) a rak si. Abu Bakr cu hruaitu ṭha pakhat a rak si. Asinain Khalifa in a ṭuan kum khat a tlin hnuah a nunnak a rak liam. Amah zong nih cun Umar ṭhiamṭhiam kha amah chaangtu Khalifa ṭuan dingah hmaisuang in a rak thim. Hi caan zongah hin zei bantuk buaibainak hmanh a rak chuak lo. Umar cu 634 kum in 644 kum tiang saupi Khalifa a rak ṭuan. Persia miphun salpa pakhat nih a rak thah ruangah Madina khua ah a rak thi. Umar cu a thih lai ah amah a rak chaangtu dingah minung 6 a rak thim chung hna. Hi caan zongah hin zei bantuk thisen chuahnak le buaibainak hmanh a rak chuak lo. Uthman cu Urman nih a rak thim chungmi minung 6 chungin an rak thim i 644 kum in 656 kum tiang Khalifa a rak ṭuan.

Umar nih kum 10 chung Khalifa a rak ṭuan lio ah hin Arab nih a biapi ngaimi teinak tampi an rak ngah. Umar nih Khalifaa a rak ṭuan tlawmpal ah mah lio chan i a ṭhawngṭha bikmi Byzantine Empire kuttang simi Seria le Palestine kha an rak lak khawh. Yarmouk (636) ralpuai ah Arab pawl nih Byzantine ralkap pawl cu an rak tei hna i an rak dawi khawh dih hna. Mah kum ṭhiamṭhiam ah Damascus zong an rak lak khawh i a hnu kum hnih ahcun Jerusalem zong an kuttang ah a rak tla. 641 kum ah Arab pawl nih Palestine le Syria cu an rak tei khawh cikcek i atu lio Turkey ram ting an rak lak khawh. 639 kum ah Arab ralkap pawl nih cun Byzantine kuttang i a ummi Egypt ram cu an rak tuk i kum thum chung an tuk hnu ah teinak an rak hmu.

Persia miphun uknak Sassanid Empire kuttang i a rak ummi Iraq zong cu Arab pawl nih an rak tuk i an rak tei. Hi ral tuknak cu Umnar nih Khalifa a rak ṭuan hlan in an rak thawk cangmi a si. 641 kum ah Iraq ram pumpi Arab kuttang ah a rak tla dih. Mah lawng si loin Arab ralkapbu pawl cu Persia zong kha an rak tuk i Nihawand (642) ralpuai ahcun Sassanid Empire ralkap pawl cu an rak tei dih hna. 644 kum i Urmar a rak thih hnu zongah Arab ralkap hna i an raltuknak teinak cu a rak dai kho rih hlei lo. Nichuahlei ah Persia tiang an rak tei hna i nitlaklei ah chaklei Africa leiṭhen tiang teinak an rak ngah i an ram a rak kau chin thluahmah.

Umar nih a rak hmuhmi teinak a biapitnak cu saupi a rak hmunh caah a si. Iran ram pumpi an rak lak i Muslim ram ah an rak ser khawh hnu cun Iran cu Arab uknak kuttang in luatnak an rak ngah. Seria, Iraq le Egypt hna tu cu luatnak an rak ngah lo. Mah ram hna cu Arab kuttang ram ah an rak tla i nihin ni tiang an si peng rih ko.

Umar cu a ralkapbu pawl nih an teimi ram hna uk khawhnak ding caah policy pawl a rak chiah piak hna. Arab pawl kha an teimi hmunhma hna ah hawi hleiin thilṭha a ngah khomi miphun ah a rak ser hna. Ukmi miphun hna nih teinak a hmumi Muslim (a tam deuh cu Arab) hna kha ngunkhuai pek a si lai. Hiti tuah hnu lawngah dai le rem in kan chuak lai. A bikin Islam biaknak lut dingin hramhram in nan sawm hna lai lo tiah phunglam a rak ser piak hna. Hi a cunglei phunglam nih hin Arab hna nih an ngahmi teinak cu biaknak lei teinak a si tuk rua lo hlah maw tiah ruahawk a um.

Umar tuahsernak hna cu mi mit a hlang ngaimi tuahsernak tampi a um. Mohammad a thih hnu Islam biaknak karhchonak dingah hin Umar hi a biapibik mi minung a si. Amah nih hin hi tluk in teinak hmu hlah sehlaw cu Islam biaknak hi nihin ni bantuk in kaupi in a karh hnga ma ti hi ruahawk ngaingai a si. Cu lengah amah chan in teinak an rak hmuhmi ram hna cu nihin ni tiang Arab ram kuttang ah an um peng rih. Asinain hi bantuk teinak hmuh khawhnak ding ca i upatnak pek ding caah cun rianṭuan a rak thawk hmasattu lamkaltu Mohammad rianṭuannak kha hmaisuangin upat pek ding a si ti cu a fiang tukmi a si. Cun Umar i a biapitnak kan kal tak a si zong le ningzahawk tlak ngaimi palhnak pakhat kan tuah a si fawn lai. A rak hmuh khawhmi teinak hna hi Mohammad nih thi a rak rawnh ciami lungput ruangah an si ding lo. Amah hruainak a ṭhat tuk ruang zongah a si fawn lo. A cheukhat cu an si a hauh caah amah tein a rak cangmi thil tampi a rak um ve ko.

Nitlaklei minung nih kan hngalh tuk lomi Umar cu minthang Charlemagne le Julius Caesar hna nakin cung sang deuh ah minṭhatnak ka van langhter tikah hin nan khuaruah a har cio ko lai dah. Umar chan lio i Arab pawl nih an rak teimi hmunhma le an rak lak khawhmi khua le ram hna cu a bitkauh in siseh, a hmunh caan a tawi sau in siseh Charlemagne si loah Caesar tehna nih an rak sermi empire hna nakin cun a ṭha deuh ti kha kan ruah chih a hau.
__________________________________

* “ The 100 A Ranking Of The Most Influential Persons In History” timi ah Machael H.Hart nih a ṭialmi chung in leh a si. Calettu- Bawi Cenhrang

THEIHTLEI

Ahmasabik Pawl (6)

Saikal
1839 ah Great Britain rammi K. Macmillan nih a rak sermi kha vawleicung ahmasabik saikal cu a si. A ke thli chem a haumi saikal a sertu cu Great Britain rammi thiam J.Dunlop a si. 1888 ah a ser cu a si i thli chemmi ke nih saikal zah a fawiter.

Mawtaw Saikal
Ahmasabik seh aa bunhmi saikal a ser i hmatpungtin a tuahmi cu France rammi P. Michauz a si. Tikhu thazang in a rak kal. Datsi thazang in a kalmi saikal tu cu Germany rammi Gottlieb Daimler nih 1885 ah a rak ser.

Tlanglawng
Ahmasabik tlanglawng cu Great Britain rammi R.Trevithick nih a rak ser. Tikhu thazaang in a kalmi a si i kuang hnuhnak ah an rak hman. Minung phormi tlanglawng zong Great Britain i The Stockton and Darlington company nih 1825 ah an rak on hmasat thiam.

Ch: Invention & Discovery

Cakei, Hngartlai le Cenghngiar

Vanchilly

Nikhat cu, cakei nih hngartlai le cenghngiar cu ramvaihnak ah aa kalpi hna. Sau nawn an vaih hnu ah sa pathum an seh khawh. An sehmi caw, meheh le saveh cu an kulh i an bawk hna.

“Lungrualte in kan ṭaang hna i adonghnak ah sa pathum kan seh khawh. Kan lak i ngakchiabik hngartlai nih hin kan tin ding savo cu run kan ṭhencheu sehlaw a tha lai ee,” tiah cakei nih cun a chimh hna.

Hngartlai cu liklak ngai i a tho i, “Ka bawipa, a nganbik hi nang nih na tin ding ta a si. Meheh cu a hme deuh caah keimah nih i lak ko ning. Cenghngiar nih saveh kha aa lak ve ko hnga,” tiah a leh.

Hngartlai bia a theih ah cakei cu a thinhun lawlaw. A zuanh colh. A pum cu a tin in a suam i a cheu, a boah dih. Hngartlai cu hmakhatte ah a thi colh. “Cu ee, kha ee a hei ti ve. Khah, kan sa sehmi cu nang nih phaw ko kun,” tiah a ho chuah pah in cenghngiar cu a hei hro.
“Bawipa, i phawt len ding a si ṭung lo. Sa kan dawinak ah chuncaw hmanh pei na rak tloh kha. Sa kan dawinak ah na thaba tuk cang lai. Na paw zong a ṭam tuk cang lai. Atu ah, caw hi ei law thinkung ngaidem tangah va zau ta. Na hlau tikah saveh cu ei supsap bantuk in na ei te lai cu. Meheh kha cu na zaanriah caah i chiah ko,” tiah nemte in a chimh.

Cenghngiar nih tinvo a then ning cungah cakei cu a lungtling. Mirh pah in a lu cu voi hnihthum a suk ta. “Kan tinvo na thencheu ning a hman. Honih dah hitin tuah ding an cawnpiak,” tiah cakei nih cun a hei hal.

Cenghngiar nih “Tunai te ah pei hngartlai nih a nunnak hmangin a ka cawnpiak ko kha,” tiah a leh.

Tuanbia nih an kan cawnpiakmi: Midang palhnak in fimnak i lak khawh a si.

Pathian Nih A Hleiin Thluachuah A Pekmi Le A Hleiin A Sermi Minung

Evan. John Ceu Mang

Vawlei cungah Pathian nih thil a sermi vialte lakah a hme he a ngan he hmuh khawhmi thil he hmuh khawhlo mi thil he asermi vialte lakah alung atling bikmi cu minung hi kan si. Pathian nih vawleicung thilnung aser hnanah khan adang cu a bia in cucu um seh khakha um seh tiah a ti hna i a biabang cun vawleicung thilnung vialte cu an hung um thluamah ko hna i cu vialte vawleicung thil a biain um hna seh tiah a timi cungah Pathian cu a lung atling i thluachuahnak a pek cio hna, (Genesis 1:22). Cun Pathian nih cun cu vialte aser dih hnu ah cun asermi thilnung vialte a hme he a ngan he uktu ding le a zohkhenhtu dingah a ti i Pathian nih cun atu cu minung kan ser cang hna lai i kanmah mui an keng lai i kanmah he kan i lo lai tiah ati, (Genesis 1:26). Cucaah Pathian nih cun minung cu ser hram a thok i Pathian nih cun minung cu tlak tlawmpal alak i mipa ah aser i mipa cu Pathian nih cun nunnak petu thaw kha a hnar chungah a chuahhnawh i mipa cu a hung nung, (Genesis 2:7). Cun Pathian nih aser mipa ADAM cu vawleicung thilnung asermi vialte zohkhenhtu dingah nichuahlei Eden dum chungah a chiah, (Genesis 2:8). Cuticun Adam nih cun Pathian nih aser mi vawleicung thilnung vialte cu a hme he a ngan he a zohkhenh hna i min zong asak hna, (Genesis 2:19). Cun Pathian nih vawlei cungah asermi vialte kha azohṭhan tikah adang aser mi hna cu khuahhnih cio in an um i cu lio ahcun Pathian nih amah muisam kengin aser mipa Adam cu amah te lawngin aum i bawmtu a ngeih lo caah amah bawmtu dingah pakhat kan ser piak lai tiah a ti. Cucaah Pathian nih mipa cu thuhluahmah in a hngilhter i ai hngilh kar ahcun a hnakruh pakhat kha azuh i minu pakhat aser i a sinah cun a ratpi. (Genesis 2:21.22). Cu tikah Adam le Evi cu Pathian nih Eden dum chungah cun aa chiah hna i vawlei ah aser mi thilnung vialte zohkhenhtu le uktu dingah nawl a pek hna i Adam le Evi cu Pathian nih thluachuahnak zong a pek hna i Adam le Evi cu Pathian nih vawlei cungah hin tefa tampi in ngeih hna ulaw nan tefa cu khuazakip ah khat hna sehlaw vawlei cu uk hna seh, cun vawleicung thilnung vialte hi a hme he a ngan he an cungah nawl ngeih hna seh a ti.(Genesis 1:8).

Cucaah kannih LAI miphun vawleicung khuaza ramkip ah a ummi zumtu khrifa vialte zong nih kannih minung cu vawleicung thilnung sermi vialte lakah Pathian nih amah muisam keng le amah Pathian changtu ah sermi kan si. Minung cu Pathian kutchuah kan si a kan sertu cu amah a si i kannih cu amah ta kan si i a mi zong kan si i a turun zong kan si (salms 100:3). Ahleiin sermi le thluachuah pekmi le kan nunnak hi Pathian nih amah ta ah le a mi le aturun ah a hleiin sermi kan si caah atulio zumtu kan zumhnak le kan nunnak ahhin Pathian caah zumhawk tlakin nung hna usih. Cun sual man thihding kan rak sinain Pathian nih a hleiin sermi le a dawtmi, thluachuah a pekmi le a khamhmi minung kan rak si caah sual man thi dingin a kan siang lo. Cucaah fapa ngeihchun Jesus khrih cu misual khamhnak kan hmuh khawhnak hnga dingah vailam cungah a thi. Zumtu khrifa vialte zong nih khoika ram kan umnak paoh ah Pathian nih a hleiin sermi le a dawtmi le akhamhmi kan si nak hi kan nunnak caan a tang rih ah Pathian caah a hleiin zumhawk tlakin hmang ve hna usi. Cuti i kan nun i zumhawk tlakin kan um asiahcun LAI miphun hi vawlei cungah kan ṭhancho chin lengmang lai i Pathian nih miphun ramdang hna sinah a hleiin thluachuahnak zong a kan pek chin lengmang ko lai. Kannih minung cu a hleiin Pathian nih asermi kan si i a hleiin thluachuah pekmi zong kan si. Cusi caah Pathian duhning tein kannih LAI miphun zumtu vialte nih nun i zuam zungzal hna usih.

Laimi Kan Pial Cang.!

Salai Biak Hlei Saang

A hlan ahcun kannih Laimi hi ram hmete, miphun hmete kan rak si. Sihmanhsehlaw kanpi kanpu hna nih dingthlu lairel sinah thluachuah bongmal rak hal hna mu. Tuchan a chuak ṭhangthar kan caah kan ramte le kan miphun sining te cu a hung ṭhangcho i miphunpi nih theihhngalh awktlak ah ai chuah ve cang. Cu kan ram le kan miphun sining kan cuanh zawn ah kan lung a hmuikhun, mikip zong nan lung a hmui cio lai tiah ka ruah. Asinain khatleikam ah kan ram le kan miphun hrawktu kan rak um ve ṭhan. Cu kan ram le kan miphun sining a hrawktu cu mikip nih phun tampi in chim cio a si tawn.

Kan ram le kan miphun a hrawktu bik cu chim cio ning in kan vun cuanh ṭhan tikah kan miphun a hrawktu taktak hi kan kheng kho taktak tawn lo tiah ka ruah. Zeiruang ko ah dah mah cu kan ram le kan miphun sining hrawktu cu kan khen khawh tawn lo kan ti si ah cun, tahchunhnak ah ... pakhat pa khi zuu ding taktak a si i pakhat pa kha mifel taktak a si ve hnga. Cu hna pahnih cu an vun i kom i mifelmi nih fel ve sehlaw a ṭha tuk hnga tiah kha zuu he ai chiahmi pa caah khan a duhtuk in khuaza tampi he a ruah ko hnga. Cun zuu he ai chiahmi pa zong nih khan mah mifel pa hi keimah sin ahhin zuu hi ding lengmang ve sehlaw hi leicung ahcun ai nuambik kan si ko hnga tiah saduhthahnak a hei ngei ve len ko hnga. Caan saunawn an vun i komh hnu ahcun mifel pa kha zuu he ai ciahmipa nih a vun tei deuh tikah cun, zuu he ai ciah ve cang ai. Hi hna pahnih nun hin kan ram le kan miphun sining a hrawktu cu a lang ngai in ka hmuh. Cucu zeitindah ka hmuhning a si kan ti ahcun — kha mifel pa kha zuu he ai ciahmi sinah khan i kom hlah sehlaw zuu dingpa ah ai chuah hnga lo tiah kan ti tawn i zuu he ai ciahmi pa tu kha chiat kan hei puh tawn. Ziah a sining ah zuu he ai ciahmi pa nak in mifim pa nih khan a tei deuh awk a si lo maw ti hi fakpi in ruah awk a herh.

Cu zawn ahcun kan ram le kan miphun sining a hrawktu cu a langbik ko rua tiah ka ruah. Cu a langhbikmi cu kannih Laimi hi kanmah pumpaak thinlung kan uk khawhlonak ruangah hin a si bik i a tuning tein mah pumpaak nunning thinlung hmanh kan i uk khawhlo a si ahcun chiatnak lei ah kan pial zungzaal ko lai. Atu kan nunning hin cun Laimi Kan Pial Cang timi hi hngal hna usihlaw nunthar in nung in mah pumpaak nunnak thinlung ai uk khomi Laimi si hna usih tiah hi capar hin kan sawm hna.

Mirang Ram Mirang Holh

Van Biak Thang

“Ha thio, ha thio!” Mi pakhat a hathio tikah nungak tlangval si ahcun aho nih dik na kong an caih tiin kan i ti tawn. Asiloah, ‘A dam, a dam’ tiin kan ti ṭheu khi. Kan ngakchiat lio ahkhan cun ‘damdam’ ti zongin an rak kan ti tawn rua, ka ti. Mi pakhat a hathio ahcun ‘Bless you’ tiah Mirang ram ahcun chim a si. ‘God bless you’ ti khi a si. An in leh ahcun ‘thank you’ an ti lai i let lo zongin an um ko lai. Hi biafang hi cauk pakhat chungah Mirang ram a phan bal lomi nih a rel in rel sehlaw, ‘Pathian nih thluachuah in pe seh,’ tiah a leh men hnga. Loh dipdep. A biafang in let loin a sullam in leh hi holhleh cu a rak si awk deuh a si.

Rian kan ṭuan lio ah ka hawipa pakhat a hathio cuahmah. Kai thawh i “Bless you” tiah neem nawn in ka hei ti. A hon ka zoh i, “I don’t want to be blessed,” a ka ti. A thinhan lung in a chimmi cu a si lo, Pathian a zum lomi a sinak a langhter duh bia a si. Biaknak dang, a bikin Muslim pawl, nihcun an rem lem lo tiah an chim ṭheu. ‘Thank you’ tiah an in leh lo zongah ziah an ka leh lo tiin ruah ding a rak si lem lo. An duh lo, an rem lo zong a rak si kho. Theih thiam tu a rak herh.

“Good morning” timi hi Laimi nih kan rak hmanmi a si lo. Kan ngei lo ti khawh a si. A biafang in kan van thlir phot i “Zingṭha” tiah kan ti. Kan hman tawnmi hna cu: Na tho ṭha maw, Na mangṭha maw, Na tho cang ti, ... tbk.. biahalnak deuh an si i chawnhmi nihkhan, “Aw, ka tho cang, ka tho ṭha,” tiah an kan leh lai. “Good morning” le “Zingtha” an dirhmun hi a nak le a rang bantukin aa ralkah. Mirang holh ahcun “Good morning” hi i ton tikah asiloah, donnak (greetings) caah an hman i “Zingṭha” timi cu Lai holh ahcun thlahnak (parting) ah hmanmi a si. “Khah, zingṭha mu,” ti ahcun kan i ṭhen lai ah kan chimmi a si. Chanthar holh belte ah ‘Na zingṭha maw?’ ti hal kan hmang ṭheu. Hihi Good morning kha Lai hman in kan hmanmi si dawh a si.

A cunglei bantuk hin “Good afternoon, Good evening” zong hi hman an si. An i khat. “Good night” belte “Mangṭha” he an dirhmun aa khat. Mangṭha timi biafang cu kan i ṭhen lai, kan i thlahnak ah hmanmi a si. Atu hrawng ah kan hman ngaimi pakhat cu “Chunṭha mu”, “chunṭha kun” ... a si. Mirang nih “Have a good day” an timi he khin i khah dawh bik an si. Australia le New Zealand ahcun ‘G’day’ timi biafang hi donnak le i ton tikah hman ngaingai an si. ‘Good day’ ti khi a sawh duhmi a si i ‘ki-dei’ tiah chim a si. Hawikom le mah rual deuh lak ahcun ‘G’day, mate’ tiah an i ti ṭheu.

Biafang tete kan i chim sual tawnmi a um len. Computer dawr ah disc ka caw lai tiah ka kal i a awchuah ka palh deuh maw a si, ka chuahning a dik hrimhrim lo dik, dick tiin an rak theih i dawr hngak pawl sum kho loin an ni. An rak theihning ahcun ‘Have you got any dicks?’ ti khi a si. Cucu a sullam kan leh ahcun ‘Chiaṭha (pa thilri) nan ngei maw?’ ti khi a rak si diam. A hnu ah ka theih i keimah tu ka ningzak. A tam deuh nihcun Diskette tiah an rak auh. Disc zong cu a aw ṭha tein chuah ahcun an theih ko hnga. Cun, chizawh khi pussy tiah kan ti ṭheu. Mirang ram ahcun pussy timi cu nu thilri caah hman deuh a si. Voikhat cu kan hawinu Mirang tarnu sinah a leng. Innka an hon on bakin chizawhte a hong tli i Lai dan takin ‘pussy, pussy’ tiah ka ti e, a ti. Mirang nu nihcun a ka zoh le a mirh duak, a ti. Inn a ṭin hnu ah a kan chimh i kan nih tu a chuak. Mah bantuk i biafang hmanning tete i ralrin ding a tam ngai.

Lam kam i tuktak a zuarmi chawdawr, Kawlholh cun laan-theih dawr kan timi, khi Mirang ram ahcun “corner shop” an ti. Mah bantuk dawr tete ahkhin tar le upa deuh pawl an chuak lut kho ngai. Thil na va cawk tikah “Hi Darling asiloah Thanks, Love” ti bantukin “darling” le “love” hmangin an in chawnh lai. A neemnak le aa dawhnak in an hman tawnmi biafang a si ti hngal loin an ka uar rua tiin na ruah sual ahcun nangmah palh.

Voikhat cu rian ka ṭuan lio ah a si. Kan manager pa nih thil lak a ka fialmi ka va pe. A hon lak i a chimmi biafang cu Lai awhchuah cun “thah” – hrik le ṭhah i ṭhah khi, a ti i a zung chungah a lut diam. Zeidah a chim aw, tiah ka lu kai kheuh. Ka theihning ah “ṭhah” a si fawn. Thah cu zeidah a si hnga, rian maw a ka fial ṭhan hnga asiloah va la ṭhan a ti duhnak hna a si hnga maw tiin a zung innka ka va kingh i ka va hal ṭhan. Zei a herhmi a um ti maw tiah ka va ti. A um ti lo a rak ka ti. Inn ka phak in “thah” cu ka kawl i a donghnak ah ka hmuh: ta = thank you. A rel tikah ‘ta asiloah tah’ tiin an ti i cucu kai lawm tinak a si ve.

Mirang holh cawn tikah zeidah a biapi bik hnga ti hi nan ruat tawn cio ko lai. Mirang holh cawn i timh tikah kanmah nih zeitindah kan chim/holh khawh lai ti nakin zeitindah an chimmi ka theih khawh lai ti tu hi a rak biapit deuh kha Mirang ram ka phak hnu ah ka hmuh. A-mirang in kan van ṭial ahcun ‘How to understand rather than how to speak’ ti a si hnga. Hi tlaihtleeng he kan kal ahcun ca kan cawnning, kan fuhpanhning le kan kalpining tampi aa dang lai.

Kan hawipa pakhat nih bia pakhat a ka hal: Mirang ram ah kum nga na um cang i mirang holh hi ka thiam bak tiin na ruat cang maw tiah. Mirang holh in kai si (bia-el) kho rih lo e tiah ka leh i kan pahnih cun kan ni len.

“Hui-ha!”

Twitter Delicious Facebook Digg Stumbleupon Favorites More

 
get car insurance